Moldovanın serbest güreşmesi çempionatında pay aldılar 17 yaşınadan güreşçilär bütün devlettän. Pay alannarın sırasında 15 sportçu Komrat sport liţeyindän. Güreşçilär getirdilär 6 ödül, angılarından iki altın.
Serbest güreşmesi Devlet çempionatı iki matta topladı devletin en kaavi sportçularını, angıları hergün geçirerlär sınışları, ki kalmaa şannı pyedestalda. Komrat sport liţeyin terbiedenneri üüsek uurda pay aldılar yarışmalarda da kazandılar priz erlerini. Altın ödülleri kumbaraya kazandılar Grigoriy Gaydarji 48 kilalık kategoriyasında, 51 kilada ilk eri kazandı Sergey Kambur. Gümüş ödülleri kazandılar Andrey Kovrikov hem Dina Vikol. Üçüncü erleri kazandılar Anna Uzun hem Yaroslav Anastasov. Nicä nışannadı trener Födor Tukan, uşaklar gösterdilär kendi karakterini, ustalıını hem kablettilär hakı tanıttırmaa devleti Evropa çempionatında.
«Uşaklar üüsek uurda pay aldılar, 15 yaşınadan yarışmalarda kazandılar ilk eri, şindi da oldular ilk. Bu diil prost. Şindi hazırlanȇrız yarışmalara 20 yaşınadan. Bizdä burada var uşaklar, angıları isteerlär kazanmaa ilk erleri»,- nışannadı trener Födor Tukan.
Trener Nikolay Mavrodi nışannadı, ani bakmadaan taramalara var taa, ne için işlemää, ne üürenmää da gitmää ileri.
«Anastasov en küçük hepsi pay alannarın arasında, 71 kilada. O gösterdi üüsek uuru kendi yaşına görä. O iki-üç yıla onnardan küçük, da kazandı üçüncü eri. Şaştırdı ikinci erlän Kovrikov . Pek gücenikiz, ani vermedilär kolaylık ona olmaa çempion , o liderdi bu çeki kategoriyada»,- Nikolay Mavrodi nışannadı.
Hergünkü sınışlar, dişţiplina hem istemäk taramaa vererlär kendi çıkışları , nışannadılar Moldovanın prizörları.
«Yarışmaklar geçtilär zor, geçirdim 4 güreş, hepsini taradın sayılan 10-0, etiştim finala . Finalda zordu, taradım 4-1. Finalda yok ilin konkurent. Onnar hepsicii hazır, finala zor etişmää».
«Bana deyni yarışmalar geçtilär ii, bän dört güreş geçirdim, hepsini taradım. Finalda güreştim çocuklan Kişinövdan , onu da taradım 5-2. Butakım ayırıldım Evropa çempionatına».
«Bu pek lääzımnı yarışmalar , zerä verer kolaylık gitmää Evropa çempionatına, Dünnä yarışmalara. Bendä 4 güreşti hem 6 konkurentti. En kaavi güreşim Kişinövdan kızlan sport liţeyindan ilk er için. Da bän ona tarattım».
«Bän geçirdim 4 güreş, iki tarattım, ikisindä taradım. Yarışmalar geçtilär ii. Bän beendim. Etişmedi inan biraz».
Hep ölä Avtonomiyanın kumbarasına ödülleri getirdilär başka sportçular da. İlk eri kazandılar Maksim Dimov Kıpçaktan, İrina Terzi Dezgincidän, ikinci erdä Kapaklı Valeriy Beşalmadan , Natalya Terzi Dezgincidän, üçüncü oldular Nikolay Arseniy Çadırdan, İlya Porumbesku hem Pavel Mavrodi Komrattan. Bu afta Gagauziyanın sportçuları pay alaceklar Moldova 20 yaşınadan çempionatında .
Moldovanın hem Gagauziyanın en mekalı haberleri GRTnın Telegram kanalında!