Komratta çekettirdi kendi işini paskellä sergisi,angısını kurdu Gagauziyanın alış-veriş palatası GİZ kurumun yardımınnan. Bu ilk bölä soyda sergi oldu Covid-19 pandemiyasından sora. Taa derindän üürendi Z.Efremova.
Sergidä pay alȇrlar yakın 20 ekonomika agenti, nicä Gagauziyadan, ölä dä Moldovanın başka dolaylarından. İnsannar var nicä alsınnar bu sergidä türlü yaanı mallarını, tatlılıkları, paskaları hem usta işlerini, nışannadı Gagauziyanın Alış-veriş palatasının başı Mihail Paşalı: «Biz istedik bu uurda illerlemäk olsun, da bizim yaşayannarda hem iş adamnarında olsun kolaylık bölä olaylarda pay almaa, neçinki bu bizim imidj, biz lääzım bakalım yortularımızı.Sergilär da, angıları yortulara adalı, taa büük fayda vererlär».
Paskellä sergisinin açılışında pay aldı Komrat muniţipiyanın başın yardımcısı Stepan Kara,angısı umutlandı,ani sergi yardım edecek ii alış-verişi yapmaa, da o getirecek fayda hem satıcılara, hem yaşayannara.
«İsteerim,ki bu sergi geçsin ii, hepsi ekonomika agentleri satsınnar mallarını. Herbir ekonomika agentinä dilerim illerlemäk olsun, açsınnar eni iş erlerini ,vergileri ödesinnär, olsun deyni kolaylık yapmaa yolları hem trotuarları hem da bizim regionumuz illerlesin»,- Stepan Kara nışannadı.
Gagauziyanın yaşayannarı notaladılar seridä temsil edilmiş malların kalitelerini.
«Beenerim. Erindeki yapıcılar. Meraklı, kim ne becerer. Daadȇrız da. Karı satın alȇr,bän daadını bakȇrım».
«Aldık rulet, paska, islää kalitedä.Bakacez».
«Uygun,ani hepsi bir erdä. Ama ilerki yıllarda taa çok vardı, vardı ne ayırmaa,şindi taa az».
«Hepsi daatlı yapılı, türlü paalara.Daatsınnar,ayırsınnar kendilerinä».
«Saa olsunnar. Geldi, hepsi var. Belli, ki sofrada da olacek».
Serginin pay alannarı urguladılar,ani bölä olaylar vererlär yortulu kefi.
«Hepsi yapılȇr, nicä eveldän yapılardı, da bunun daadı ii».
«Seftä pay alȇrım bölä sergidä, bana bu bir eni becermek da bana meraklı,bu eni bişey».
«Assortiment- bizim meyvalar,bendä kendi başçam var, koydum onu maasuz o iş için,ki şokolatlı malları yapmaa. Benim satın alıcıları gelärsä ,angıları beni şandora 6 yıl bilerlär, belli, ki satmak gidecek».
Paskellä sergisi Komradın kultura evindä açık insannar için aprel ayın 16-dän 18-nädän, saat 9-00-dan saabalen saat 18-00 kadar avşamnen.
Moldovanın hem Gagauziyanın en mekalı haberleri GRTnın Telegram kanalında!