Gagauzlarda büün dä taa var insannar, angıları ilerlederlär eski zanaatları. Çobanсılık onnarın birisi. Baurçu küüyün yaşayanı Daniil Paşalı çok yıl geeri pensiyaya çıktıynan çeketti hayvan tutmaa. 10 yıl şindän, nicä bakȇr kendi koyunnarını tırlada ölä da insannarın. Zor mu büün çalışmaa buu uurda, annadacez bizim süjetımızda.
Daniil Paşalı başladı fermer çalışmaa taa 10 yıl geeri, bilmäzkän bu iş için bişey, makar taa küçüktän onnarın aylesindä tutardılar hayvan. Büün onun çorbacılıında 50 koyundan hem keçidän zeedä, angılarını o hergün besleer, tertipleer. Seviner herbir duumuş olacaa yada kuzucaa.
«Bu işi dill lääzım brakmaa, bu bizim ekologiya tarafından pak mallarımız, en ilk, hayvan bakılȇr hem otlȇȇr o otu, angısını o beener. Ne da olmasın, brakmaa bu işi dill lääzım. Çençlerä da aanadȇrız bu işleri, ki tutunsunnar, da işlemää lääzım. Zor pek zor, ama zor olmadaan, kolay olmȇȇr»,- dedi fermer.
İşlemää çoban büün diil kolay, çünkü iş pek zor. Otlatmak vakıdında çobannar her gün 10-20 kilimetra sıcak havada geçerlär, ki hayvannara bulmaa ii otlatmak erleri hem sulamaa deyni. Çünkü bulmaa kendinä ortak, strungar pek zor. Onun için Daniil Paşalı işleer şindi kendi fermasında yalnız, yazın iş olȇr taa çok, onun için gelerlär yardımcılar.
«Günümüz çekeder yazın saat dörttä erken, geleriz, toplȇȇrız, ayırȇriz koyunnarı, saamaa, saadıynan, tertipleeriz sütleri. Bizdä nesoy, bän toplȇȇrım insandan koyun. Bän diilim yalnız, işlerim dä. 500 koyunadan alȇrız. Her sabaa hem her avşam vereriz insannara süt. Var strungarımız saayȇrız. Çocuklar gelerlär, yardım ederlär»,- nışannadı Daniil.
Bu zannaat çobana kaldı onun batüsundan, angısı haliz bu işlän zanaatlanardı. Da sıra geldi almaa hepsini elä da üürenmää hepsiciini enidän.
«Boba, açan braktı bana, da bän üürendim bunu yalnız kendi başıma. Zor açan olȇr kuraklık, bizdä her yıl sıcaklar olȇr, su yok, su etişmeer hayvannara. Sıra geler suyu getirmää. Bän çektim küüdän suyu burayı. Ama bu zor. Otlatmaa deyni erlär var»,- söledi çoban.
Daniil Paşalı, danışarak genlerä, nasaat eder, ki tutunsunnar bu iştän, angısı kaldı dedelerdän. Bakmadaan zorluklara, bu zanaatın var ii tarafları da, taazä soluklan soluyȇrsın, saalıına deyni faydalı, bütün gün kırda gezersin. Ama o gücenikli, ani onun kendi uşakları çekilmeerlär bobasının zanaatına, hem ani çobancılık yıl-yıldan var nasıl unudulsun.
Moldovanın hem Gagauziyanın en mekalı haberleri GRTnın Telegram kanalında!