KDU geçti buluşmak Gagauziyanın patriotunnan, angısı taa küçüktän sevärdi kendi duuma erini, dilini da başladı kendi fikirlerini yapraa yazmaa. Födor Kroytor tutȇr aklısında gagauz halkın yaşamasından çoyu olayları. Kendi yaratmalarınnan o pay oldu studentlärlän hem üüredicilärlän.
Buluşmada studentlärlän hem KDU üüredicilerinnän poȇt halktan , nicä söleer kendisi için Födor Kroytor , annattı, nicä onun anası taa küçüktän üüredärdi onu okumaa gagauz hem rumın dillerindä. Şindi o pensiyada da onun tefterlerindä diil bir yaratma rus hem gagauz dillerindä. Kendi ilk sıracıklarını gagauz dilindä o yazdı taa küçükkän eski bibliyanın kabında.
«Benim ilk şiirim yazılıydı 1959 yılda, ozaman biz başladık üürenmää gagauz dilini, bir yıldan sora geçtik rus dilinä, da te maasus bu vakıt yazılıydı. Bibliya kiyadında, angısını çevirmişti Çakır, yapışıktı maavi kab, da onda yazılıydı 1959 yıl, bän onda bir-iki sıracık yazdım»,- nışannadı Födor Kroytor.
Nicä nışannadı Födor Kroytor, o seviner ona, ani buluşmaya geldilär nicä studentlär, ölä da üüredicilär. O sayȇr, ani gençlär lääzım bilsinnär hem üürensinnär ana dilini literaturadan.
Kendi yaratmalarında avtor açıklȇȇr kendi küçüklüünü, ana dilinin gözelliini, üürenmeyi okulda hem saygıyı üüredicilerä. Hepsini bu duyguları o geçirdi kendi içindän. O teklif eder gençleri unutmamaa köklerini hem ana dilini.
«Ana dilimizi biz yok nicä unudalım, bizim dedelerdä, bobalarda hiç yoktu kiyat, ne dä yazı, onnar unutmadılar, verdilär boydan-boya, da açan unukalar büüyärdilär, onnar da uşaklarına annadardılar, koruyup onu. Şindi vat taa çok kolaylık hem internet, aç, bak, gençlerä bu uurda taa kolay»,- avtor açıklȇȇr.
KDU studentleri urguladılar bu buluşmaların önemliini, hem ani lääzım bilmää ana dilini.
«Födor Kroytor Gaguziyanın patriotu. Da bölä buşuluşmalarda biz çok üüreneriz bizim ana topraamız için , annȇȇrız, ne duyȇr yazıcı hem nicä açıklȇȇr bizä kendi duygularını»
«Bän mutluyum, ani büün buluştuk yazıcıylan, bu pek meraklıydı, duyulȇr, ani şiirlerdä açıklanȇr onun yaşaması, duumaa erin gözellii».
Nicä nışannadı pedagogika bilgileri doktoru Galina Mutaf, bölä buluşmaları onnar geçirerlär sık, ki studentlär üürensinnär taa çok kendi eri için, insannar için.
«Geçirip bölä uurda olayları, biz savaşȇrız teklif etmää yazıcıları, angıları sade çekederlär yazmaa gagauz, rus dillerindä yada anılmış şairleri. Ko studentlär katılsınnar, çünkü bölä olaylarda, buluşup insannarlan, angıları yazȇrlar kendi yaratmalarını, sesleyip, kendileri da var nasıl çeketsinnär yazmaa»,- nışannadı pedagogika bilgileri doktoru Galina Mutaf.
Födor Kroytor hep ölä yazdı poȇmayı üç paydan”Gagauziyanın koraşlı oolları”, angısında annadȇr Gagauziyanın kurulmak etapları için. Plannarında var tiparlamaa kendi kiyadını.
Avtor: Z. Kanţır, operator: V. Kıssa, motaj: İ. Rezuneţ
Moldovanın hem Gagauziyanın en mekalı haberleri GRTnın Telegram kanalında!