Orak ayın bitki pazarında Deniz Flotun günü bakılêr. Kıpçak küüyün denizçileri adeti bakarak, kendi büük yortu günündä kutlȇȇrlar biri-birini, kafadarlarını hem askerlik vakıdını akılına getirerlär.
Orak ayın 28-dä, eski Sovet Birlii devletlerindä, Deniz Flotun gününü bakȇrlar. Bu bir gün, angısı birleştirer hepsini, kim askerlii denizdä geçti. Gözäl adetä görä, yortuyu Kıpçak küüyüdä dä baktılar, burada unutmȇȇrlar hem sayȇrlar evelki adetleri. Kıpçak küüyün her bir denizçisinä, Deniz Flotun günü en meraklı duygularlan baalı.
«Sabaalen açan kalktım, formayı aldım elimä, hazırladım, içimdä duygular uyandı, sevinmeliktän, ani genä bu yortuya etiştim. Nekadar Allaa saalık verecek, hep gelecäm, kendi formamı giyecäm, kendi yortumu kutlayacam»,- Födor Hrapakov annattı.
İlk statyada starşına Födor Trandafil, sıcak duygularlan akılına askerlik yılları getirer, angıları bütün yaşamasına kaldılar onun canında.
«84-cü yılda, bän çaarıldım askerä Deniz Flotunda Sevastopol kasabasında. Onbirinci oträtta askerlii geçtim, Deniz Flotunda Balaklava kasabasında, Çernomorskiy Flotunda»,- starşına Födor Trandafil nışannadı.
Sabaalen, dizilmektän sora, denizçilär gittilär mezarlaa koymaa çiçek anmak taşına, saymaa kafadarlarını, kim yok onnarın yanında.Onnar kendi kuvedinnän anmak taşını koydular, ki anılsın onnarın kafadarları.
«Onnarı, biz burayı geldiynän, akılımıza gitireriz. Bundan kaarä kim büün saa, kim büün slujbada, biz onnar için buyurȇrız üz gramm. Elbetki, bu yortu büük, hepsi denizçilerä Kıpçaktan, Kongazdan, Tomaydan, Kazayaktan çoçuklara, Moldovadan hem bütün Sovet Birliindän, bän isteem hepsini kutlamaa bu günnän. Bän düşünerim, bu günü biz ötää dooru da bakacȇz»,- ilk statyada starşına Nikolay Dragan söledi.
Efimiya Verbanova denizçilärlän bilä geldi anmaa kendi adamını Dmitriy Verbanovu. O nışannȇȇr, ani onun adamı büük saygı duyardı askerlii Deniz Flotunda geçärkän.
«O büük saygı duyardı, bizä deyni, önemli tutmaa aklımızda bu işi, onun unukası da isteer gitmää onun izlerindän. Biz bu gün, hep savaşȇrız gelmää bu anmak taşın yanına. Saalık hepsi denizçilerä, sevinerim, ani unudulmȇr bu yortu- bu pek önemli»,-annattı Efimiya Verbanova.
Moldova Respublikasının yaşayannarı, angıları geçtilär askerlii deniz flotunda, sayerlar kafadarlıı hem birlii kendi arasında, onuştan, her yıl bakȇrlar bu yortuyu. Kıpçak küüyün denizçilerin kuvetlerinnän, ilk anmak taşı denizçilerä, koyuldu Kıpçak küüyündä.
