17 yıl GRT işleer cümnä kompaniyanın statusunda. Teleradiokompaniya kabletti 2007-ci yılda, makar ki da regional televizionun istoriyası çeketti 20-ci asirin 80- ci yılların sonunda. Nicä işleer cümnä kompaniyası büün, annadȇr Natalya Andrieş.
Kompaniyanın baş neeti oldu hem kalȇr siiredicilerin haberlemesi olaylar için Gagauziyada. «GRT»- tek presa izmeti, angısı üç dildä işleer. Taa çok gagauz dilindä. Her gün gösterer olayları, angıları avtonomiyanın küüyülerindä hem kasabalarında olȇrlar. Kompaniyanın uzmannarı avtonomiyanın yaşayannarınnan barabar istoriyayı kurȇrlar, sayȇr haber izmeti başı Tatyana Stavilova.
«Yakın 20 yıl çalışȇrım kompaniyada. 17 yıl bu kompaniya cümnä statusunda çalışȇr. Bän pek hodullanȇrım, ani biz büünkü gün ilerlederiz bu kompaniyayı, biz avtonomiyanın istoriyasını göstereriz insannara, göstereriz, ne olȇr avtonomiyamızda, ne olȇr devlettä. Hem pek umutlanȇrım, ani biz herzaman ne türlü problemalar da olmarsaydı, biz herzaman savaşacez ilerletmää bu kompaniyayı hem savaşacez göstermää, ne olȇr avtonomiyada hem ne olȇr devlettä. Bizim herbir çalışanımız her gün bunun için geler işä. Ko herbir insan duysun kendini lääzmnı bu kompaniyada, hem herbir siiredici sevsin o işi, angısını biz yapȇrız»,- nışannadı Tatyana Stavilova.
Her sabaa «Eni gün» programanın götürücüleri selämneerlär siiredicileri hem savaşȇrlar onnarın kefini kaldırmaa. Jurnalistika diişti, ama kaldı aylä, angısı kendi işini sever hem becerekli yapȇr, nışannȇȇr TV baş redaktoru Valentina Koroläk. O urguladı, ani «GRT» cümnä statusunda açık hem dooru annadȇr hepsini, ne olȇr avtonomiyada hem dünnedä.
«GRT» durgunmȇȇr. Kompaniya ilerleder giriştirmää eni tehnologiyaları hem yayınlanmak formatlarını, ki kalmaa aktual hem meraklı kendi auditoiya için. Büün biz 17 yılı nışannȇȇrız, nicä olduk cümnä kompaniyası. Bu vakıt, açan türlü yaratmak başarları kazandık. İsteerim şükür etmää bütün komandayı da adamaa onnara saalık hem ii çıkışları. «GRT» oldu avtonomiya yaşamasının bir payınnan da koruyȇȇr hem ilerleder bizim kulturamızı»,- nışannadı baş redaktor.
Cümnä kompaniyanın işini kontrol eder Gözledici nasaatı , organ, angısı bakȇr ki kompaniyanın işi cuvap etsin cümnenin ilerlemesinä. Barabar «GRT» önderciliinnän işleer bakarak kanonnara teleradio uurunda, nışanandı gözledici nasaatın başı İrina Drangoz: «Sizin barabar işinizin yardımınnan Gagauziyanın hem Moldovanın herbir yaşayanı bakabiler sizin televizyonunuzu da kableder haberleri. Adȇrım sizä başarları hem üüsek çıkışları jurnalistika uurunda».
Bu vakıdın içindä «GRT» –da peydalandılar siireicilär diil sade avtonomiyada, ama bütün devlettä. Yaşayannarın çoyu siirederlär programaları, haberleri, angılarını her gün kompaniya uzmannarı yapȇrlar.
«Bütün ürektän isteerim kutlamaa sizi hepsinizi, kim çalışȇr büünkü gün «GRT-da», da Alla sizä hepsinizä saalık versin, saburluk, dayanmak hem inan, neçinki bu işlär inansız ileri yok nicä gitsin. Aranızda herzaman olsun birlik, duşmannar sizä köstek koymasınnar, yardım etmää istämersäydilär, engel etmesinnär».
« Her keret siirederiz «GRT» haberleri, kultura programalarını bakȇrız, pek beeneriz programaları. Alla versin sizä çok saalık, bu gün sizi kutlȇȇrız. 17 yıl — diil bir yıl , nekadar energiya, nerva, kuvet lääzım, o üzerä sizä çok-çok saalık Alla versin da herzaman bizä gösteräsiniz, söleyasiniz. Biz ta sizin yanınızda görelim, ne olȇr dünnedä, çünkü küülerdän biz pek çıkamȇȇrız, ama bu programaların yardımınnan çok işleri bileriz».
«Biz sevineriz sizin programalarınıza, televideniyanıza, ani hepsini üüreneriz, ne küülerdä olȇr. Saa ol sizä. Olsun sizdä saalık, annaşmak olsun, kendi programalarınızı yapasınız, bizi sevindiräsiniz, çok saa ol».
Oktäbrinin 29-zu – «GRT» cümnä kompaniyasının duuma günü. O işleer Komrat televizionun sora da Gagauz regional televizionun temeliindä.
