Puşkin – en anılmış hem sevgili şaircilerin birisi bütün dünnedä.Onun yaratmaları çevirili çoyu dillerä hem üürenilerlär okullarda hem universitetlerdä. Fevralin 10-da Aleksandr Puşkinin anmak günündä geçti çiçeklerin koyulması onun büstuna Komratta.
Puşkinın yaratmaları sevgili hem okunan, onun için anmak da geçer evladlardan evladlara. KDU studentleri,angıları üüredici zanaatını kablederlär, urguladılar,ani Puşkinın yaratmaları aktual büünkü gündä kalȇrlar,yardım ederäk uşaklara moral zenginniklerin temelini kabletmää:
«Biz üüreneriz olmaa rus dilin üüredicileri, da gelecektä üüredecez uşakları. Puşkinin şiirleri çok önemni evlad boylar için, neçinki yaşamaya üürederlär, lääzımnı becermekleri illerlederär.Onun yaratmaları ilişerlär o temalara,angılarınnan insan geçmiş zamanda karşılaşarmışlar, hem şindiki zamanda».
Gagauziyada andılar şairciyi. Onun büstuna Şannı alleyada çicekleri koydular Gagauziyanın başkanı E.Guţul, GHT başı D.Konstantinov, GHT deputatları hem Bakannık komitetin azalları, KDU studentları.
«Bu gündä,fevralin 10-da 1837 yılda Puşkin raametli oldu yara kabletmesindän Danteslan düüştän sora.Resim galereyasında geçti konferenţiya,adalı Puşkinin yaradıcılıına.Olayda pay aldılar M.Maruneviç adına Bilim- aaraştırmak merkezin temsilcileri. Puşkinin yaşamasından meraklı sayfa- Bessarabiyaya yollamak, açan şairci sade 21 yaşındaydı».
«Bu Bender, Akkerman, Kagul ,da biz var nicä sayalım,ani Puşkinin gezmesi geçti bizim topraklarımızdan.Burada onun şiirlerindän kimi sıracıkları getirderiz aklımızа»,- M.Maruneviç adına Bilim-aaraştırmak merkezi uzmanı Vitaliy Boykov nışannadı.
G.Gaydarji adına rus dilin üüredicisi Alöna Deli urguladı,ani Puşkinin yaradıcılıı oynȇȇr büük rolü zamandaş uşakları yaklaştırmasına rus dilinä hem kulturasına.
«Aleksandr Sergeeviç Puşkin-rus literaturasının klassikası, bu ilk adımnar rus dilinnän tanışmakta. Cäba demeerlär,ani Puşkin –bizim hepsimiz.O girer herbir insanın yaşamasına kendi masallarınnan.Herbir onun yaratması – moral arifliin zenginnii.O diil sade büük üüredici,ama haliz dost da»,- Alöna Deli urguladı.
Puşkinin yaradıcılıı çıkȇr vakıdın sınır aşırına, bölä sayȇr Bilim aaraştırmak merkezin uzmanı Aleksandra Kristova. Onun yaradıcılıınnan tanışmış taa küçüklüündä.
«Puşkin vardı,var hem olacek.Onun poeziyası cannandırȇr,kanatlandırȇr.Onun yaratmalarında terbi edildi çoyu evlad boyları,da düşünerim,ani ölä olacek ileri dooru da»,- Aleksandra Kristova sayȇr.
Büük şaircinin anması, angısının zaametleri dünnä literaturasına girdilär, illerleer yaşamaa eni evladların cannarında.
