«Düz-Ava» oyun hem türkü ansamblisi 25-ci sıradan konţerdi geçirdi, angısı adalıydı kollektivin kurucusunun,maȇstrunun Semön Pometkonun duuma gününä.
3 saat sıradan «Düz-Ava»Moldova anılmış klektivi, Gagauz Avtonomiya türkü hem oyün ansamblisi siiredicileri unikal muzika kompoziţialarınnan, halk oyunnarınnan sevindirdi.
«Adetçä aylemizlän konţerdä geleriz. Pek beeneriz. Ansamblidä oynȇȇrlar benim uşaklarım da. «Düz-Ava»ansamblisinä ii başarılar dilerim hem her keret siiredicilär onnarı üüsek urda karşılasınnar».
«Herbir elementtä, notada gagauz halkın yaşaması duyulȇr.Gagauz kulturasına uzun ömür».
«Eni programa. Oyuncular, türkücülär, orkestrular -hepsi büük professinal».
Renkli giimnär, gözal seslär, halk oyunnar kultura evini inanılmaz duygularınnan doldurdular, nışannadı kultura bakanı Marina Semönova: «Gördünüz, ani kulturamız zengin, oyunnarımız şeremet, avalarımız düz, türkülerimiz derin maanalı. Olannarımız daa gibi, kızlarımız gül gibi. Sade sevinelim. İsteerim sölemää ,ani büük iş yapȇrsınız,diil sade Gagauz Erindä, ama respublikada hem başka memleketlerdä dä.Gösterersiniz, ani var ölä bir halk,angısının gözäl kulturası».
Gagauziya Başkanı Evgeniya Guţul kutladı ansambliyi da şukur etti artistleri, ani onnar koruyȇrlar kulturamızı, adetlerimizi hem üüsek uurda Gagauz Avtonomiyasını dünneyin başka sţenalarında da göstererlär.
«Çoyu türküleri, angılarını siz şindi çalȇrsınız, bän bilerim taa küçüklüümdän, biz bütün ayläylän onnarı çalardık. Da bän pek isteerim, ani bizim uşaklarımız, bizim unukalarımız bilsinnär, korusunnar hem ilerletsinnär gagauz halkın kulturasını hem adetlerini»,- Gagauziya Başkanı Evgeniya Guţul nışannadı.
Gagauziya başkanı Evgeniya Guţul Şannı kultura izmetçisini Georgiy Kurtevı ödülledı: Gagauziya Halk Topluşu hem Bakannık komiteti adından gramotayı hem avtonomiyanın 30-cü yıldünümünä adalı madaliyi verdi.
Musaafirlär, siiredicilär nışannadılar, ani konţert,angısı adalıydı Maestro Semön Pometkoya,belli eder, ani gagauzların kulturası yaşȇȇr.
«Dimirtovkadan geldim. İlerdän sık gelärdik,şindi taa sirek. Pek şaştım ,halez,açan hepsi uşaklar sţenaya çıktılar! İnanılmaz gözellik».
«Seftä geldim bu gözäl konţerdä Dimitrovkadan (Ukraina).Üremdä çok sıcaklık kablettim. Kızım burada üürener. O teklif etti beni. Pek sevindim ,uşaklara mayıl oldum. Çaarsınnar bizim da uşaklarımızı.Salık,uzun ömür kolektivä».
Konţerdin kulminaţiyasınnan oldu onun bitki nomerı açan sţenaya birdän 200-dän zeedä artist çıktı.
