Fevral ayın 5, Hükümetin oturuşunda Sergey Çernevı Komrat devlet kanţeläriya bölümünün başına geçirdilär. Kendisi S.Şernev açıkladı, ani bu görevdä bulunarak isteer yapmaa ölä, ki ofiţial Kişinövun hem dä Komradın aralarında dialog kurulsun.
Kendi ilk intervyusunu S.Çernev, atrtık Komrat devlet kanţeläriya bölümü eni başı olarak laf.md portalına verdi. LafZone programasında S.Çernev annattı, ne neetlän kayıl oldu bu uurda işlemää.
«Bän bu görevä kayıl oldum bir neetlän — Komradın hem ofiţial Kişinövun aralarında dialogu düzmäk için»,- S.Çernev annattı.
Komrat Devlet kanţeläriya bölümü başına S.Çernev fevralin 5-dä geçti. Bu kararı Hükümet kabletti. Hükümeti baş sekretari Artur Mija bunun için söledi: «Çernevın baş davaası yapmaa ölä, ki GHT hem Bakannık komiteti kanona görä kendi işlerini götürsünnär. Hep ölä o lääzım yapsın ölä, ki hepsi devlet kurumnarı sırasıyca işlesinnär hem vatandaşların hakları korunsun. Bundan kaarä o lääzım göz altında tutsun, ki avtonomiyada devlet politikası ilerlesin».
Yanvarin ikinci payında, taa bu görevä geçmedään, S.Çernev NTS kanalında Moldova hükümetini, ministruların işinä kritika yaptı.
«Bizim devletimiz tepedän çürümää başladı. Komunistlär ministru görevinä en iilerdän en iilerini seçärdilär. Demokratlar hem soţialistlär prostların sayısından en iileri seçärdilär. Şindi sä o ministrulara bakınız. Onnar annayamȇȇrlar, neredän hem nereyä düştülär hem ne yapsınnar lääzım»,- S.Çernev söledi .
S.Çernev söledi, ani ministrular diişsinnär lääzım.
«Vardı lafta, ani hükümet iştän çıkarılacȇk da eni ministru kabineti kurulacȇk. Diil lääzım bakmaa, angı partiyadan o kişi. En önemni, ki o ii bir uzman olsun. Bizdä sä ministruların erlerini diiştirdilär, da bununnan iş bitti»,- Çernev söledi.
GRT-nın redakţiyası denedi baalanmaa Hükümetin temsilcilerinnän, ama cuvap kimsey vermedi. Bu üzerä şindiki zaman hükümet Çernev Sergevın bu sölediklerini netürlü notalȇȇr, belli diil. 2006-cı yıldan 2013-cü yıla kadar S.Şernev Valkaneş dolay administraţiyasının başında bulundu. Hep ölä S.Çernev 3 keret GHT deputatı oldu. III, IV, VI çarışlarda. 2015-cidä hem 2023-cüdä Başkan görevina kandidat oldu. Şindi o Komrat devlet kanţeläriya bölümünün başı. Öncä bu görevdä Gennadiy Kazanjı bulunurdu. O bu işi kendi istediinä görä braktı.
