Komrat devlet üniversiteti 34-cu yıldönümünü tamannȇȇr. Bu gün burada geçti universitetin yıldönümünä adanmış «Bilim. Üüretmäk. Kultura», Halklararası bilim-praktika konferențiyası. Üüredicilär, aaraştırıcılar 18 devlettän toplandılar açıklamaa aktual problemaları bilim, üüretmäk hem kultura uurundan da kutlamaa KDU başarılı dataylan.
KDU Moldovanın universitetlerin aarasında 7-ci erdä bulunȇr. Bu başarılara etişmäää deyni bu kurum çok zorluklardan geçti, çünkü çoyu insannar annamaardılar, neçin gagauzlara üniversitet lääzım. Hep ölä aaz kim inanardı, ani bu ideya gerçeklenecek. Hepsi zorluklara karşı durardılar universitetin kurucuları. Maasuz onnara adalıydı şükür lafları. Bundan kaarä, konferenţiya, baalı kurumun 34 yıl dönümünnän, çeketti yaradacılık sergidän, angısı adadıydı gagauzların kulturasına hem yaradıcılaa. Artık 34 yıl başarılı hem açık yolda, angısında KDU gagauz bölgenin akademik merkezi hem gelecek zamanın temeli oldu, universitetin başı Sergey Zahariya çizgileer: «Bu gün gözäl bir yortumuz var KDU 34 yıldonümümü kutlȇȇrız. Biz bileriz, ani kaliteli üüretim verer bizim studetlerimizä kolay hem serbest duymaa kendini ana topraanda, devlettä hem yabancı erlerdä dä. Biz bilim tarafından da çalışȇrız, biz çok işleri yapȇrız da bu diil bitkisi barabar başka devletlärlan – Azerbaycannan, Türkiyaylan. Bu hallar yardımcı olacek diil sadece Moldovada, ama bütün dünnedä dä».
Rektor Sergey Zahariya urgulȇȇr, ani büünkü günä üüretmäk kurumu aktiv işbirliklerini kurȇr da diil sade Moldovanın sınırlarında, ama halklar arası uurunda da sayılȇr.
«KDU tanıyȇrlar diil sade Moldovada, ama dünnedä dä. Biz gördük, ani statistikaya görä, KDU kazandı 7-ci uuru Moldovada, 32 bin dünnä universitetlerin arasında biz kazandık 11 bin uurunu. Bu gösterer, ani bizi bilerlär hen tanıyȇrlar. Bu yapȇr ölä , ki biz çalışalım taa zeedä hem ilerleyim»,- Sergey Zahariya urgulȇȇr.
Dört fakultet hem 30 zanaat ekonomika, üüretim, kultura, üridika hem çifçilik uurlarında. Üniversitetin studentleri devlet hem avtonomiya stipendiyaları kablederlar, ne verer onnara havez hem stimul taa ii üürenmää hem üüsek halklar arası üüretimin proektlarına katılmaa. Ama bu universitetin en büük özelli, ani o gagauzluu koruyȇr, Moldova üüretim hem aarıştırmak Ministerliin sekretari Adriana Kazaku çizgiler: «Sayȇrız, ani KDU kendi misiyasını, neetini hem işini başarılı yapȇr. Çünkü onnar ii uzamannarı üüretim uurunda hazırlȇȇr. Ne taa önemli — onnar hazırlȇȇrlar uzmannarı gagauz dilin uurunda. Gagauzların halkının ana dili yavaș-yavaș kaybeler. Onuștan biz sayȇrız, ani sadece bu universitetin hepsi universitetlerin arasında var bir ayırı missiyası – koruma gagauz dilini, yapmaa onu paalılık gibi, üürenmää hem savaşmaa, ani taa çok gençlär bilsinnär hem ilerletsinnär kendi ana dilini».
Aaraştırmak konferenţiyasında, baalı universitenin yıl dönümünnän, düzüldü türlü toplantılar hem diskusiyalar, angısına katıldı uzmannnar dünnenin 18 devletindän, onnarın arasında aaraştırıcalar Turkiyadan, Azerbaudjandan hem Rumıniyadan. KDU Kuktura hem yaradıcılık kafedranın başı Tatiyana Şögoleva annattı, ani bu yılın temaların arasında zorluklar, angılarına karşı geler büünkü üüretimin sisteması, üüretmäk metodları ilerlemesi hem üniversitelerin rolü.
«Her yıl fevralin 11-dä, açan biz kutlȇȇrız universitetin duuma gününü biz geçireriz Aaraştırmak konferenţiyayı da, angısına katılȇr uzmannar dünnenin türlü erlerindän. Biz lafederiz, payalaşȇrız bakışlarımızlarlan, fikirlerimizi, işbirlikeri kurȇrız, kaldırȇrız önemli soruşları. Temalar halizdän pek geniș — onnar baalı hepsi kafedranın işinnän»,- Tatiyana Şögoleva annattı.
Toplantıların sonucunda kabledildi rezolüţiya, angısı universitetin hem akademik cümnenin baş neetlerini çizgileyecek.
Avtonomiyanın kuvetleri da savaşȇrlar universitetinnän işbirliktä herzaman bulunmaa, annadȇr Halk Topluşun deputatı Grigoriy Dülger.
«O bizdä bir KDU. Bizim Gagauziyanın yaşayannarına deyni o çok paalı hem onemli. Büük saa ol o adamnara, kim sindi yaşȇȇr da verdi kendi küvetini, saalını, terini kurma bu universiteti hem toprakları iilin olsun o insannarın, angıları bizinmnän şindi yok»,- dedi deputat.
Konferenţiyada KDU-tin üç üüredicisi Moldova üüretim Ministerliindän diplomaları özel başarıları için kabletti. Nışannȇrız, ani 91-cidä küçük ayın 11 Komrat universiteti devlet statusunu kabletti.
Avtor: D. Ikizli, operator: S. Georgiev, montaj: A. Gerçu