Kongaz küüyün T. Zanet adına liţeyindä akademik T. Zanet «Yaşadıkça Yaşa» eni toplumun prezentaţiyasını geçirdi. Bu toplantıda bulundu Türkiyenin Genel Konsolu Komratta Ȇda Güç.
Akademiin Todur Zanetın eni toplumun «Yaşadıkça Yaşa»prezentaţiyasında pay aldı Türkiye Genel Konsolu Komratta Ȇda Güç, üüredicilär hem da üürenicilär. Toplumun avtoru Todur Zanet annattı, nicä peydalandı ideya kiyadı yazmaa.
«Bän yılda bir sıra ilaçlanȇrım bolniţada. Bıldır, yatarkana, doktorun yardımcısı koydu bana kapelniţayı, saa elimdä yazaldı, sol elimdä kapelniţaydı, da bu kıpım bän düşündüm, nesoy bu yaşamak kısa, da halezdän lääzım «Yaşadıkça Yaşa»,- Todur Zanet annattı.
Türkiyenin Konsolu Komratta Ȇda Güç şükür etti akademii Todur Zanetı teklif için toplumun prezentaţiyasına.
«Dil hem kultura — bu halkın özel paalılıı .«Dil hem kultura — bu en paalı, ne verili sizä ecellän. Siz bunu yapmarsaydınız, ozaman olmayacek halk kendisi dä, olacek asimiläţiya, da ozaman siz hiç halkta sayılmayacenız. Todur Zanet toplȇȇr folklor, yazȇȇr yaratmaları kendi halkı için, bununnan izmet eder kendi ana dilin kuruması için hem da ilerlemesi için»,- Ȇda Güç annattı.
Kongaz küüyün T. Zanet adına liţeyin öndercisi Mariya Çebanova nışannadı, ani kendi yaratmalarında Todur Zanet annadȇr insanın paalılıkların zenginnikleri için hem önemlikleri için, angıları belli ederlär gagauzların aylelerini.
«Biz hodullanȇrız, ani akademiin Todur Zanetın eni toplumun «Yaşadıkça Yaşa» prezentaţiysaı geçti maasuz bizim liţeyimizdä. Bizim üürenmäk okulumuz büük hodulluklan taşıyȇr onun adını. T.Zanet sayılȇr açık örnek gibi halezdän gagauz gibi patriot. Kendi yaratmalarında T.Zanet açıklȇȇr sevgiyi kendi ana gagauz dilinä»,- Mariya Çebanova nışannadı.
Kongaz küüyün T. Zanet adına liţeyin gagauz dili üüredicisi Mariya Duşkova çizgiledi, ani üürenmäk okulunda gagauz dili üüreniler nicä ana dili.
«Toplum içindeliinnän bän tanıştım taa geçän afta. Orada tiparlı pek mertaklı peetlär. Bän sayȇrım, ani bizim gençlär hem da büük yaşta insannar okuyaceklar hem da hoşlarına gelecek, ne orada yazılı, çünkü peetlär yazılı bütünnä üürektän»,- Mariya Duşkova çizgiledi.
Matröna Bargan, Kongaz küüyün T. Zanet adına liţeyin gagauz dili üüredicisi, çizgiledi: «Şkolamız onun adını taşıyer, onun için onunnan sık buluşȇrız. Yaratmalarını okuyerız, hepsi tiparlı işlerini, nicä o söleer, ellektän eleriz. Pek derin fikirli yaratmaları var, filosofiyalı yaratmaları var. Okuyarak, her zaman bişeylär eni alȇrız».
Toplumun prezentaţiyasında liţeyin büük klasların üürenicileri toplumun avtoruna verdilär soruşları, angıları onnarı meraklandırȇr, hep ölä okudular T.Zanetın peetlerini.
«Var şiirlär, angıları vardılar şkola programasında. Bütündän akademi Todur Zanetın yaratma yolu pek geniş her taraftan, gösterer gagauzlu, gösterer Buca, gösterer vatanı. Okuyarkana onun yaratmalarını, her zaman neysa eni kendinä alȇrsın, üürenersin»,- nışannadı Nikolay Frangu.