Hakların günü bakıldı dekabrinin 10-da. O getirder cümnenin aklısına nakadar önemli haklar hem, ani onnar lääzım korunsunnar, olsun serbestlik , bakmayarak soţial statusuna yada bakışlara.
Hakların günü- data, angısı getirder aklıya Dünnä insannarın haklarında Deklaraţiyayı, ani hergün lääzım korumaa herbir insanın temel haklarını, urguladı Komrat kasabasının Halk Advokatın temsilciliin başı Svetlana Mironova: «En ilktän o Dünnä hak deklaraţiyası,angısı kabledildi 1948 yılda, Evropa insannarın hak konvenţiyası. Bu iki dokument temeldä durȇrlar. Ama burayı taa girerlär halklararası paktlar hem başka da sölemää,ani halklar arası kanonnar ii mehanizmayı temsil ederlär. Ne baalı milli kanonnan- çekederäk Konstituţiaydan hem başka norma dokumentlär belli ederlär insannarın haklarını».
Svetlana Mironova urguladı,ani insannarın hak tutturmasında soruşlar herzaman aktual kalȇrlar.
«En önemli,olsunnar kolaylıklar.Büünkü gün onnar var, bu- davaa dooruluu, korumak hem üridik yardımı.Onnar kurulu,ki herbirindä olsun kolaylık korumaa kendi haklarını»,- Svetlana Mironova urguladı.
Avtonomiyanın yaşayannarı paylaştılar kendi fikirlerinnän nesoy uurda devlettä bakılȇrlar onnarın hakları.
«Bakılmȇȇrlar».
«Sanȇrız, ki kimsey insan için bişey yapmȇr».
«İnsannarın hakları lääzım korunsunnar,elbetki.Ama adam da diil lääzım unutsun,ani onnarı iki taraftan bakmaa lääzım. Varsa-lääzım tutmaa, ama biz dä lääzım yapalım ki korunsunnar.Alalım bana taa yakın-mediţinayı. Biz lääzım yapalım ne mediţina belli eder,ama gelärsän doktora, o verärsä ilaç, sän tutmarsan,bozarsan,nasıl yazılı bakmaarsan, ozaman nesoy haklar için laf gider?».
Urgulȇȇrız,ani Dünnä insannarın haklarında Deklaraţiyası kabledildi Birleşik Milletlerin kurumun genel assambleyasınnan 1948 yılın dekabrinin 10-da.Data bakılȇr her yıl, angısı getirder aklıya o kurallar hem zenginniklär için, angıları için kabledildi Deklaraţiya.