GHT ekonomika, investiţiya, bücet hem finans komisiyası oktäbrinin 9-da «İnvestiţiyalar için» kanon diişmeklerinä açık seslemeklerini geçirdi . Onun avtoru Bakannık komiteti. İnvestiţiya subsidiyalar verileceklär ekonomika agentlerin yardımnamak fondundan.
«İnvestiţiyalar için» kanon diişmeklerin giriştirmesi lääzımnı regional ilerlemesini tutturmaa investiţiyaların yardımınnan hem iş erlerin açılması için. Böleliklän Gagauziya vergi ödemekleri zeedelenecek, nışannadı Gagauziya ekonomika ilerlemesi bakanı Larisa Çerven.
«İnvestiţiya subsidiyaları verileceklär, alarak esaba ekonomika agentlerin yardımnamak fondun kaaviledilmiş harçlarını. Kanon proektindä merkez bücetindän finansların optimizaţiyası belli ediler. Çıkarıldılar ölä investiţiya işleri nicä yapıların yapılması, yolların düzülmesi. İnvestiţiya subsidiyası verilecek ki türlü tertipleri n satın almaa, injener- komunikaţiya infrastrukturalarına, kanalizaţiya sistemalarına, sıcak su, gaz hem elektrik baalantılarına vergi paysız»,- nışannadı Gagauziya ekonomika ilerlemesi bakanı Larisa Çerven.
Kabledilmiş kanon verecek kolaylık eni iş erlerini açmaa, nışannadı Larisa Çerven.
«Harçalara görä, angıları bir million leydän iki million leya kadar kurȇrlar, lääzım olacek açmaa beş eni iş erini. İki milliondan üç million leya kadar varsaydı, ozaman lääzım olacek açmaa 10 eni iş erini. Üç milliondan taa zeedä olarsayd harçlar, ozaman sıra gelecek 15 eni iş erini açmaa»,- ekledi Çerven.
Eni diişmeklerin koşullarına görä avtonomiyada kendi işini işletmää lääzım beş yıldan diil taa aaz eer kurum büüksäydi, ama eer o orta hem küçük kurum ozaman üç yıldan diil taa aaz, ondan sora investiţiya subsidiyalarını kabledeceklär.
«Eni iş erlerin açılması, angılarına investiţiya preferenţiyaları veriler, getirecek Gagauziya bücetinä taa çok gelir, soţial sigortalamak hem mediţina bücetlerin büülmesinä. Hep ölä investor, angısı yaper kendi mallarını Gagauziyada lääzım olacek mallarda hem izmetlerdä markirovkayı “Yapılı Gagauziyada” koysun»,- sayȇr uzman.
GHT üridik komisiyasının çıkışlarında var kimi tekliflär «İnvestiţiyalar için» kanonun diişmeklerindä, nışannadı deputat Nikolay Ormanji.
«Var yannışlıklar tehnika tarafından, reglament statyalarında hem Temel kanonunda. Buna nicä bakȇrsınız»,- dedi Ormanji.
Kendi sırasında Bakannık komitetin temsilcileri nışannadılar, ani hepsi çıkışlar toplandılar, ama üridik komisiyasının çıkış bakışı taa geç geldi.
«Kimi punktlarınnan kayıl olȇrız. Temel yannışlık o, ani açık seslemeklär geçmedilär. Ama şindi onnar geçtilär. Finans- ekonomika tarafından çıkışlar var. Finans bakannıı da kendi çıkıllarını açıkladı, orada söleniler, ani bücettän harçlar bu kanonun giriştirilmesinä olmayaceklar»,- çizgiledi Çerven.
Açık seslemeklerdän sora «İnvestiţiyalar için» kanon proekti bakılacek GHT oturuşunda.