Komratta açıldı geliştirmäk merkezi, angısının çalışması baalı yardımnan özellekleri olan uşaklara. Kim hem angı neetlän onu açtı üürendi Dora İkizli.
Neetlän açmaa Komratta geliştirmäk merkezi çıktılar analar. Onun davası türlü forma autizmaylan uşaklara yardım etmää. Onnarın savaşmaklarınnan hem insannarın yardımınnan merkez açıldı. Orada 20 uşak terbiediler, ama merkezin öndericileri neetlenerlär genişletmää taa 50 kişiyä erleri. Uşakları uzmannar individual metodikaya görä üüredeceklär, angısının maanası bulmaa yaklaşım her bir uşaa, merkezin başı Mariya König annadȇȇr.
«Biz ABA sistemasına görä çalışȇrız, onun maanası uşakların kendilerini götürmesinä analiz yapmaa. Burada çalışan uzmannarımızı psihologlarımızı, terbiedicilerimizi, asistentlarımizi üürettik bu metodikayı kullansınnar. Şindiki zaman bu terapiya en faydalı sayılȇȇr. Onu butün dünnedä kullanȇrlar, ani uşakları autizmaylan üüretmää»,— söledi Mariya König.
Merkezdä uşakları üürederlär dooru okumaa, lafetmää, annamaa sözü, nicä kendini bakmaa, giinmää hem imää.
«Uşaklar merkezä hergün gelerlär, pazartesindän cumayadan.İndividual terapiyada bir buçuk saat bulunȇrlar. İleriya dooru neetleneriz açmaa grupa derslerini dä, çünkü uşakları lääzım hazırlamaa uşak başçalara hem okullara. Bu da pek önemni»,-nışannadı uzman.
Merkezin başı Mariya urgulȇȇr, ani lääzım dooru terbietmää hem üüretmää diil sadece uşakları, ama onnarın ana-bobalarını da.
«Önemni üüretmää ana-bobaları da, çünkü Gagauziyada onnar kıyışmȇȇrlar annatmaa, ani var ölä uşakları.Onnara da lääzım yardım hem destek. Annadık, ani bu soruşta problema var, çünkü kendimiz bunun için annatmayarsak kimseyin haberi olmayacek»,— söleer Mariya.
Moldovada 1300 insan türlü forma autizmaylan yaşȇȇr.
