Kaldı birkaç afta üüretmäk yılın çeketmesinädän. Üürenicilär barabar kendi analarınnan- bobalarınnan çekederlär aktiv okul için hazırlanmaa- satın alȇrlar tefterleri, yazalları, kalemneri, enilederlär rubaları hem da psihologiya tarafından hazırlanmakalrı geçirerlär. Bizim çekim grupamız üürendi nesoy etapta hazırlanmak proţesi bulunȇr hem nekadar para lääzım olacȇk bu işä.
Eni üürenmäk yılın yaklaşmasınnan analar-bobalar taa sık çekederlär düşünmää, nicä taa islää uşaa okula hazırlamaa. Adımnarın birisi o üüretmäk tertiplerin satın alması. Kiyatlar, tefterlär, yazallar, kalemnär hem başka okul tertipleri sentäbrinin birinädän hazır olsunnar lääzım.Avtonomiyanın yaşayannarı paylaştılar nedän hem nicä hazırlanmakları çekederlär.
«Bakarak başka yıllara, şindi hazırlanmak taa çok var. Pek çok didaktika materialları sıra geler satın almaa uşaklar için, çok üüretmäk kiyatlarını, türlü posobiyaları, elbetki zor, para lääzım olsun, ama saa ol bizdä Gagauziyada makar ki birär, birärbuçuk bin ley vererlär şkolaya hazırlanmaa. Analar -bobalar en lääzımnı işleri alabilerlär. Uşaklar üürensinnär lääzım, sevsinnär üürenmää, da ilerlesinnär hem büüyüsünnär. Hepsi para eder. Analar -bobalar vakıdı da sayȇrlar, ki uşaklara almaa neysä faydalı hem önemni».
«Şindi taa paalı. Benim vakıdımda taa ucuzdu, nekadar şindi. Taa çok ucuzdu. Rubaları almaa deyni bir uşaa lääzım harcamaa 3 bin ley. Ama taa bir uşaam yaslaya gezer. Ozaman yakın 5-6 bin lääzım iki uşaa hazırlamaa».
«Lääzım anaların -bobaların finans durunmuna bakmaa. Ama hepsi savaşȇr, nicä taa islää olsun. Ki uşaklar taa gözäl olsunnar, taa kısmetli hem taa aarif».
«Düşünerim, ani şindi zor yaşamaa, neçin ki hepsi paalı, ama hep okadar hazırlanȇrız, hepsini okul için alȇrız. Bitki parayı verersin alȇrsın, ki uşaklar okula gidäbilsinnär».
Kanţeläriyä malların satıcısı Tatyana Kılçik söledi, ani para harcanacȇk tertiplerin alması için, bakarak ne hem nekadar alınacȇk. Örnek gibi, okul cantası için annattı.
«Hepsi baalı cantanın kalitesinä, neçin ki başlankı klaslar için alȇrlar ortoped arkasınnan cantayı, orada paa da başka, ölä söleyecez ,700 leydän taa yukarı. Hepsi baalı olacȇk anaya- bobaya. Ortadan bir bin ley. Da te o paralar, angılar verileceklär herbir uşak için harcanacȇklar uşakların şkolaya hazırlanmasına. Sora da ayakkablarına, rubalara, bütündän bir bin ley bir uşaa»,- söledi Tatyana.
«Hepsi gider yavaş-yavaş, pasiv. Bän düşünerim, ani avgustun bitki iki aftanın içindä taa çok insan gelecek».
Gagauziyada üç yılın süresindä analara- bobalara veriler soţial yardımı birär bin ley uşakları şkolaya hazırlamaa deyni hem da taa 500 ley zor durumda bulunan aylelerä hep bu neetlär için veriler.
