Canavar ayın 6-da D.Tanasoglu adına Gagauz Milli Teatrusu gösterecek Anton Çehovun «Kirez Başçası» pyesasına spektakliyi. Onu koyȇr Çehovun adına Milli Teatrusu rejısöru, Moldova anılmış artisti-Dmitriy Koev. Bitki hazırlanmaklar için bekleyän premiyeranın önündä, annadȇr bizim korrespondentımız Oleg Duloglo.
Dionis Tanasoglu adına Gagauz Milli Teatrusu bu yıl başladı 27- teatr sezonunu premyeradan. Teatr gösterecek Çehovun pyesasını. Moldova anılmış artisti, Kişinöv Çehov adına Milli Teatru rejısöru, aktör Dmitriy Koev annadȇr, ani o çoktan istärdi koyma Çehovun pyesasını da göstermää onu siiredicilerä.
«Bän çoktan istärdim koymaa Çehovun pyesasını, kendi teatrumda Kişinöv kasabasında. Onu şindi yok kolaylık başa çıkarmaa. Burada sa, kafadarlarım söledilär, ani Çehovu taa göstermedilär, butakım da çıktı bu ideyä. Bu anılmış bir yazıcı, onuştan pek çok vakıt hazırlandık, Çehovda var dört akt, ama biz biraz kısaltık onu, çünkü açan pek çok gider spektakl, zor siiredicileri tutmaa»,- dedi Koev.
Dmitriy Koev annattı, neçin spektaklinin premyerası önemli bir gün.
«Bu ilk keret olȇr, lääzım söyleyelim, ani bizä deyni bu önemli zaman , ilk keret gagauz dilindä Çehov pyesasını gösterecez. Var nasıl sölemää, ani biz istoriyayı yazȇȇrız»,- sayȇr o.
Anton Çehovun «Kirez Başçası» pyesası gagauz dilindä gösterilecek «Gagauz dilinin kullanmak sferasını genişletmäk için» kanona görä.
«Biz mutlak koyduk planımıza, Anton Pavloviç Çehovun pyesasını alıp, çıkarma sţenaya, da göstermää bizim siiredicilerimizä. Çehovun biz hiç bir dä spektaklisini koymadık, şindi kararladık koymaa, da çıkarmaa sţenaya. Şükür Allaha, teklif ettik Kişinövdan Çehov teatrusundan rejışöru Dmitriy Koevı, da o bizimnän koydu bu spektakliyi. Şindi, bizdä premyeraya karşı bitki repetiţiyalar geçer»,- annattı Mihail.
Bekleyärkän spektaklinin premyerasını, ama açıklamadan hepsini ne bekleer siiredicileri, artistlär nışannȇȇrlar, ani hepsi siiredicilerdä bu spektakl brakacȇk unudulmaz duyguları, neredä herkezi bulacȇk ne ona yakın.
«Herbir aktör, angısı pay alȇr bu oyunda, gösterer kendisini, herbir aktörun var kendi teması. Hepsimiz savaşȇrız bu spektaklidä kendimizi bütündän göstermää, ani yaşamak pek hızlı geçer»,- nışannȇȇr oyuncu.
Anton Çehovın pyesasına görä spektaklinin premyerası geçecek Çadır muniţipiyasında canavar ayın 6-da, saat 18:00, girmäk olacȇk parasız. Spektaklinin premyerası rus dilindä geçecek canavar ayın 13-dä, girmäk olacȇk paraylan.
Аvtor: О. Duloglo, operator hem montaj: L. Arfanos