Kuduzluk- o infekţiyä, angısınnan var nasıl hem hayvan, hem insan ulaşsın. Hasta hayvannardan insan var nasıl ulaşsın. Nicä korumaa kendini kuduzluktan, annadȇr Natalya Andrieş.
Yaban infiţir hayvannar kuduzluk hastalıın sızıntısı ev hayvannarı için olȇrlar, söledi Komrattakı cümnä saalık merkezin epidemiolog doktoru Semön Atanasov.
«Ulaşmak yolları butakım- yaralardan yada tırmaşıklardan, ulaşmış hayvannarın tükürüündä viruslar bulunȇrlar. Onnar deridän geçerlär, tükürüklerdän, da sora nerva sistemasına etişeerlär»,- nışannadı Atanasov.
Ev hayvannarın vakţinaţiyası hem insannarın haberlemesi nicä evsiz hayvannarınan kendini götürmää. Hepsi bu ölçülär vereceklär kolaylık kapmamaa kuduzluk hastalıını, ekledi Semön Atanasov.
«Kuduzluklan güreşmää deyni lääzım nesoy sa mehanizmalar olsunnar. Bizdä var plan- proekt kuduzluklan güreşmää, angısını parlamentä taa 2012-ci yılda temsil edildi da şindiya kadar bu soruş çözülmedi. Primariyalar bileerlär, ani onnar kuduzluklan güreşsinnär lääzım sms bişey yapameerlar , neçin ki yok mehanizma»,- çizgiledi Semön.
Moldovada türlü ölçüleri kablederlär, ki kuduzluk hastalıınnan ulaşmak olaylarını aazaltmaa, söledi Gagauziyada imek malların korumasında bakannıın veterinar inspektoru Andrey Kurka. İki keret yılda uçaan yardımınnan vakţina koyulȇr yabancı faunaya.
«Maasuz briketları daadȇrlar, sora birbuçuk iki aydan sora tilkileri öldüreriz, da bakȇrız nesoy proţent vakţina uuru hayvannarın arasında var. İsteerim sölemää, ani bitki vakıt kaldı sade 20% yabancı faunadan, ani diil aşılı. Eer yabancı fauna vakţinayi kabledärsäydi, ozaman ev hayvannara aş koydurtmaa diil lääzım»,- sayȇr Kurka.
Kuduzluk o hastalık, angısını var nasıl kapmamaa. Mediklerdä var faydalı ilaçlar, angılar koruyabileceklär kuduzluktan insanı, eer kişi aşı yardım için danışacȇk.
«Sabunnan lääzım yarayı yada dalanmış eri yıkamaa, yodlamaa, da hızlı doktora gitmää. Bu olacȇk en dooru bir adım, neçin ki ne kadar taa yakın mozaa dalamak, okadar taa hızlı insan var nasıl ulaşsın da ölsün kuduzluktan», —nışannadı uzman.
Kuduzluu var nasıl yok etmää bilärkänä kuralları. Lääzım esaba almaa hem yapmaa kuralları, nicä dooru bakmaa ev hayvannarını: köpekleri hem kedileri. Her yıl getirmää onnarı veterinar klinikasına,neredä yaşȇrsınız, ki profilaktika aşıları koydurtmaa kuduzlaa karşı. Bitki statistika haberlerinä görä, kuduzluktan her yıl yakın 60 bin kişi öler. İmek malların korumasında milli agenstvosu haberledi, ani 2003-cü yıldan beeri Moldovda kuduzluk hastalıınnan 3 ulaşmak olayı oldu.
Аvtor: N. Andrieş, operator: V. Kıssa, montaj: А. Gerçu