Orak ayın 15 Komrattakı profesional uçilişçesi başladı kabletmää dokumentleri türlü zanaatlara. Bu yılda bu üüretim kurumu neetlener kabletmää 180 student. Onnardan 160 üürenici yakışacek üürensinnär büdjet formasında, 20 uşak sa yakışacek üürensinnär kontrakt formasında bulunarak.
Bu yılın Komrat profesional uçilişçesi neetlener kabletmää 180 (üz sekisan) gençleri 4 uzmannık dalında. Üürenmäk kurumu kalȇr tanınmış abiturientların arasında, annadȇȇr uçilişçenin başı Evgeniy Buzadji. O çalışȇr burada artık 15 yıl. Sayȇr, ani en onemni üüredicilerin çalışmasında diil sadece üüretmää, ama vermää uşaklara zanaatın praktik annamasını da.
«Dokumentleri kablederiz bu zanaatlara görä: avtomehanik – var 60 büdjet hem 10 kontrakt eri, elekromonter-elektrik — üürenmäk 3 yıl sürteer,, var 30 büdjet hem 5 kontrakt eri. Elektromontajnik — üürenmäk 3 yıl sürteer, var 30 büdjet hem 5 kontrakt eri. Hem taa bir zanaat – marangoz zanaatı, üürenmäk angisi 2 yıl sürteer, onda var 30 büdjet hem 5 kontrakt eri»,- Komrat profesional uçilişçenin başı Evgeniy Buzadji söledi.
Abiturientların arasında var onnar da, kim taa seçmedi kendisinä zanaatı yada şüpelener. Onnar gelerlär uçilişçeya dostların yada anaların-bobaların nasaatına görä. Meraklan bakınȇrlar, siirederlär üüretim kabinetları hem usta odaları. Andrey başardı dokuzuncu klası. Kameradan utanȇȇr, ama annatı, ani seçti kendinä elekromontajnik zanaatı. Biraz dalgalamȇr. Geldi vermää dokumentleri bobasınnan, angısı kendi nasaatınnan yardım etti şeçmää zanaatı.
«Düşündük- düşündük da kararladık vermää dokumentları burayı. Düşünerim, hepsi ii olacek» 00:43-00:47 “Üüretmäl kolektivı ii, uşakları üürederlär, nedän üürenmeyelim burada».
Ama bakmayak şüpelerä herbir uşak geler kendi soruşlarınnan – sorȇrlar zanaatlar için, ne üüreneciklär, angı becermekleri kazanaceklar, bulabileceklär mi başarmaktan sora kendinä iş.
«Var uşaklar, angılar gelerlär da bilerlär, angı zanaatı seçmää, onnar annȇrlar, ne ister. Danışȇrlar soruşlarlan da, sorȇrlar, neylan zannaatlanȇȇr bu yada başka uzman, sorȇrlar gösterelim onnanara kabinetları, neredä onnar üüreneceklär, sorȇrlar, ne olaylar derserldän kaarä var. Sport içiт meraklanȇrlar, sorȇrlar, olacek mı sport urokları »,- elektrik disţiplinaların üüredicisi nışannadı.
Bu yılda uçilişçedä bir enilik peydalandı. Abiturietlar, angılar isterlär hem üürenmää, hem çalışmaa, kazanıp para, yakışȇr seçsinnär kendisinä dual üüretim formasını elekromontajnik olarak.
«Hepsi erlär bu grupada olacek büdjet eleri. Bu zanaatın var avantajı, ki bursadan kaarä student kabledecek parayı, angısını o kendisi kazanacek iştä. Bölä 30% üüretmäk vakıdından onnar üüreneceklär uçilişçedä, kalan 70% geçereciklär iştä»,- Komrat profesional uçilişçenin başı Evgeniy Buzadji açıkladı.
Geçmiş yılın içindä bu üüretmäk kurumda enilendi koşullar: düzdülär eni usta odaları hem lääzımnı instrumetleri satın altdılar. Uçilşçenin başı nışannȇr, ani her yılın üüretmäk kurumu kurȇr statistikayı, ani annamaa deyni, kaç kolverilmiş student buldu kendinä iş. Bölä, onnarın arasından 40% bulȇr kendinä iş hem çalışȇr, kimi studentlar giderlär ötää dooru üürenmää.
«Biz teklif ederiz uşaklara işlesinnär o kurumnarda, neredä onnar geçerlär praktikayı. Kimi uşaklar başarmaktan sora orada kalȇrlar hem çalışȇrlar “Zanaatlarımız halizdän lääzımnı. Uşaklar gelerlär da dokumentlerini burayı vererlär»,- Komrat profesional uçilişçenin başı Evgeniy Buzadji söledi.
Abiturientlerin alımı iki turda geçirelecek. İlk tur geçecek Harman ayın onusunadan. Onnar, kim etiştirmeyecek vermää dokumentleri, yakışȇr yapsınnar bunu ikinci turda, angısı geçecek Harman ayın ondördüsündän irmi sekizinä kadar.
