KDU Açık kapular geçirildi, angısı yardışm edecek gelän abiturientlara tanışmaa unuversitetin tekliflerinnän hem üüredicilerinnän. Barabar genç olannarlan bizim çekim grupamız da olayda bulundu.
Liţeyilerin başarannarı için KDU açık kapular olayi geçirildi. Onu unuversitetin büük zalasında yaptılar. Gelän abiturientların önündä universitetin rektoru Sergey Zahariya hem fakultetlerin temsilcileri. Studentlär paylaştılar kendi düşünmeklerinnän üürenmäk proţesi için. Sergey Zahariya nışannadı, ki gelän studentlär lääzım ayırsınar maasuz KDU-ni.
«Her yıl KDU açȇr kapularını liţeyistlerä kim üürener Gagauziyanın hem Moldovanın liţeylerindä. Ne iş için bunu yapȇrız»,- Sergey Zahariya nışannadı.
Genç olannar, angıları büünkü gün şindän sora üürenerlär KDU-dä paylaşȇrlar ki universitetin hem zaanadın ayırılması onnara deyni plannı oldu.
«Bän istärdim gitmää Kişinöva ama kaldım evdä neçin ki evdä taa ilin üürenmää. Evdä sän duyersın kendini kendi Ana topranda uz duran kişi gibi. Taa ilin kendini tutȇrsın. Bizim universitet verer hepsini ne lääzım üürenicilerä deyni. Bän teklif ederim bizim üürenicileri gagauz devlet universitetinä».
«Universiteti başararkan hiç dilim pişman, ani ayırdım bu uuru, çünkü bütün yaşamam baalıydı çiftçiliklän. Yok hiç korkum, ani kendimi bulmayacamţ Benim erim büünkü günä baalı».
Liţeistlär yakın vakıtlarda bakalavra ekzamennerini hem üürenmäk erini ayırsınar lääzım olacek. Onnar annadȇrlar, ki taa ilin universiteti ayırmaa deyni lääzım çok informaţiyalan tanışmaa. O üzerä Açık kapu olayları lääzımnı hem faydalı.
«Taa bişey kararlamadım, düşünerim. Bana önemni bakalavra ekzamennerini vermää, sora da göreciz ne yapmaa».
«Bän taa bilmerim nesoy zaanat bän ayıracam. Şindi düşünerim sade üürenmää hem üürenmää ileri».
«Büünkü olaya geldim annamaa ne isterim. Kendi yolumu ayırdım, ama taa düşünerim neredä üürenmää, onuştan isterim gormää neyi teklif eder KDU».
Açık kapular olayin ofiţial payından sora liţeyistlär kafedralarlan tanıştılar ki derindän türlü zaanatlar için annamaa. Getirecez aklınıza, ki KDU 1991 yılında kuruldu. Büünkü gün 4 fakultettä 1680 student üürener.
Avtor: L. Novak, operator: V. Kıssa, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!