Çadırda Hristozun Duuması adına klisesindä geçti ikona yazması ilk master -klas. Onu hazırladı ikona yazması usta Kira Yayman. Lääzım nışannamaa, ani Kira verer çok yaratmak master-klaslarını, ama bölä ikonalarlan baalı master-klası geçirdi ilk keret. Hep burada da hazırdı ikona sergisi.
İkona yazmasınnan tanışmaa geldi çok kişi. Uşaklar ana-bobaylan istedilär diil sade görmää bunu, ama kendileri da denemää nesä yapmaa. Birkaç saadın süresindä pay alannar masterin herbir lafını sesledilär, açıktılar kabletmää taa çok meraklı informaţiyaları. Onnar üürendilär, nesoy tafta ikona için hazırlanêr, angı renkleri, materialları kullanêlar, nesoy altın koyulêr hem taa başka işlär. Pay alannar pek sevindilär, açan onnarın kendilerin oldu kolaylıkları denemää bu evelki incäzanaatın tehnikalarını. Kira Yayman ii bir üüredici bu uurda olarak, yardım etti hem annattı derindän. Pay alannar yaptılar kendi ellerinnän Hristozun nışanını hem kruçayı , angısı gösterer nekadar Iisus zeetleri çekti.
«Bu gün pek meraklı bana deyni, pek gözäl annattılar bizä İisus Hristoz için. Büün biz yaptık gözäl resimnär hem isteeriz taa çok bilmää bu iş için»,- Kira Yayman annattı.
«Bu bizim dinimiz, onu lääzım bilelim, üürenelim hem uşaklara annadalım hem dä bölä bir iş yapalım. Biz yapêrız kruçayı, ondan sora balıı, gözäl yapêrız, bizä annadêr bizim dinimizi, yaşamamızı»,- yaradıcılık merkezi resim üüredicisi Stepan Jelezoglo annattı.
Herbir kişi, angısı burada bulundu, derindän ptoţesä yaklaştı hem annadı,ani ikona yazmaa — bu diil sade bir tehnika, ama ayırı bir yol, neredä lääzım olsun dayanmak hem can usluluu.
«Pek meraklı te o, ne biz teoriyada işittik, nicä boyalar, minerallar yımırtanın sarısınnan kaarıştırılêrlar. Biz kendi gözlerimizlän bunu gördük. Uşaklar, ani geldilär, kendi ellerinnän denedilär yımırtanın sarısını çıkarmaa. Pek meraklı kendi ellerinnän bölä büük işä dokunmaa, büük ikona yazılmasın»,- Maksim Gümüşlü, protoierey yardımcısı, annattı .
Hristoz Duuması adına klisesi protoiereyi Sergey Veliksarov nışannadı, ani bölä master-klaslar bu diil sade yaradıcılık becermeklerini ilerletmäk, ama derin din hem can baalantısı.
«Umut ederim, ani bu derstän uşaklar alaceklar becermeyi, adeti, nica yazmaa ikonaları, hem da kimsä bekim Allah verärsä, bizim aramızda olacek ikona ustası, kilsedä, bizim dolayda var taa ne yazmaa ikonalara»,- Sergey Veliksarov nışannadı.
Master-klasın baş neetiydi- tanıştırmaa pay alannarı ikona yazılması kanonnarınnan, dedi ikona yazıcısı Kira Yayman: «Büün vardı çok insan, çok uşak. Bän pek sevinerim,ani onnar oturdular bukadar vakıt da yaptılar hepsini, ne biz koyduyduk neetimizä, ne yapılacek büün. Вырезать… Büün uşaklar yapıştırdılar altını, gördülär, bekim aazıcık,ama nicä yapılêr ikona. Hem kendileri da denedilär yapmaa nesä, neylän onnar gittilär büün evä».
Bu master -klas braktı hepsinin canında bir sıcak izi, verdi ihlam eni bilgilerä hem, bekim, kimäsä deyni oldu bir adım taa derindän bu ustacılaa çekilmää.
Avtor: A. Karapirä, operator hem montaj: L. Arfonos