Moldova iş hem soţial ministerliin başı Aleksey Buzu haberledi, ki MD hükümeti Evropa Birliin yardımınnan hepsi aylelerä kompensaţiyaları verecek, bakmayarak, verdilär mi onnar danışmaklarını bu kompesaţiyayı kabletmää deyni osa vermedilär mi.
Moldovada 75 bin aylä sıcaan hem şafkın verilmesi için kompensaţiya yanvar ayi için kablettilär. Onnarı banka kartalarına dooruttular. Kimin kartası yok,var nasıl bu parayı poçta bölümnerindä kabletsinnär, nışannadı iş hem soţial ministerliin başı Aleksey Buzu: «Yanvar ayı için 1 milion 437 bin insan kompensaţiya kabledecek. 2024-cü yılın noyabri hem dekabri ayları için hem 2025- ci yılın yanvar ayı için 1 milliard 534 milion ley verildi».
Gelän aydan Moldova devletin Hükümeti ȇlektroȇnergiya tariflerin bir payını hepsi yaşayannara çevireceklär, haberledi Aleksey Buzu: «Moldova devletin Hükümeti Evropa birliin yardımınnan kapadacek tarifın üselmesini. Yardım edilecek hepsi aylelerä, bakmayarak, verdilär mi onnar danışmaklarını bu kompesaţiyayı kabletmää deyni, osaydı vermedilär».
Vatandaşlar yanvar ayı için kompensaţiyaları artık kablettilär. Hükümet açıkladı, ani kompensaţiyaların orta sayısı — 1 bin ley kurdu.
