Gagagauziya Kultura bakanı Marina Semönova Avtonomiyada kultura uurunda gerçeklenmiş işleri raporunu açıkladı.
Gagauziya Kultura bakanı Marina Semönova nışannadı, ani 2024-cü yılda gerçekleştirildi çok önemni proekt, angıları dooruduldular gagauz kulturasını korutmaya hem ilerletmeyä. Bu olayların arasında festivallär, halk kolektivlerini desteklemäk, genç talantları bildirtmäk, kiyatların tiparlaması hem çok taa önemni programalar hem proektlär. Marina Semönova nışannadı Kultura bakannıın göz altında bulunan kurumnarının başarılarını.Hepsi onnnar gagauz kultura varlıını korumaya hem zenginnetmesinä dooruduluydular.
«Gagauziya Kultura bakannıın işindä 2024-cü yılda belli edildilär te bu prioritetlär:gagauz milli kulturayı korutmak hem yayınlamak, gagauz dilini kullanmak ortamın genişlenmesi, kultura kurumnarının incäzanaat becermeklerini ilerletmäk hem desteklemäk, uşak incäzanaat uurlarını desteklemäk hem zenginnetmäk, Gagauziya yaşayannarının regionda gerçeklenän kultura olaylarında pay alması»,- dedi Semönova.
Başarılı oldu yıl o taraftan da, ani oluşların çoyu Gagauziya 30-cu yıldönümünä adandılar. Onnarın birisi fotokonkurs oldu.
«Avtonomiya 30-cu yıldönümünä hem «Gagauziya maasuz hak statusu» kanonun kabledilmesinä adandı konţert, angısı dekabri ayın 23-dä geçti. Sţenaya çıktılar nicä anılmış artistlär, ölä dä gençlär, angılarına deyni büük sţenada profesionallarlan çalmak ihlam gibi oldu»,- kultura bakanı.
Gagauziya Bakannık Komiteti başın yardımcısı Viktor Petrov kultura uurunda çalışannarı onnarın kultura vaarlıın korumasında çalışmakları için şükür etti.
«Si̇zi̇n sevgi̇ni̇z, talantınız yardım ederlär Gagauziyamızın kultura uurunun ilerlemesinä. Siz adetlerimizi koruyȇrsınız hem evladlara ihlam verersiniz. Sizin izmetiniz doldurȇr bizim yaşamamızı muzikaylan, oyunnarlan, resimciliklän, spektaklilärlän hem halk yortularınınnan. Siz kurȇrsınız ölä atmosferayı, angısı Gagauziyamızı unikal yapȇr»,- çizgiledi Petrov.
Yaparak çıkışları, Marina Semönova şükür etti kultura izmetçilerini, incazanaat kolektivleri hem herbirini, kimin katkısı regionun kultura ilerlemesindä var.
Avtor: A.Terzi, operator: V.Kıssa, montaj: İ.Rezuneţ