Moldovada E171 imek elementi,angısı biliner taa nicä titan dioksitı, kullanmakta yasak ediler imek malların yapmasında .Milli imek koruntuluk agentstvosu üüseltti kontrolü panayırda hem sınır geçmär punktlarında, maasuz kurallar tutulsunnar deyni.
E171 imek elementi yada titan dioksitı sık kullanardı vermää deyni türlü imek mallarına biyaz rengi, te ölä, nicä undan yapılı tatlı mallarda, makaronilerdä, supalarda hem başka. Bunun için haberledi İmek malları kontrol etmesi bölümü baş inspektoru Elena Petrova.
«Bu karar geldi Evropa komissiyasından,angısı nışannadı,ani E171 yok nasıl kullanılsın nicä imek eklemesi.Bu kararı bizä verdilär,da biz bu uurda çalışȇrız»,- söledi uzman.
Aaraştırmaklar göstermişlär,ani E171 var nicä zarar versin adamın saalıına, onuştan da onu olmaz kullanmaa imek malların yapmasında.
«Hepsi mallar,angılarında var titan dioksitı, hem angıları panayıra geldilär, satılaceklar bitkiyadan, nekadar var onnarın korunmak vakıtları hem da skladlarda mal sayıların bitmesinä kadar.Açan korunmak vakıdı bitecek, ozaman o imek malları lääzım satılıktan çıkarılsınnar»,- çizgiledi Petrova.
Avtonomiyanın yaşayannarı paylaştılar,ani satın alarkan malları, sık bakȇrlar malların toplumnarına, bilmää deyni ne kullanıldı onnarın hazırlanmasında.
«Palma oloyu olmasın deyni, damarlarda o kalmasın, olsun taa kaliteli deyni».
«Şindiki zamanda çok türlü fasıl mal var hem otalanmak. Diil natural hepsi,bu üzerä da bakȇrım listeya».
Urgulȇȇrız, ani imek mallarında titan dioksitı yasak,ama var nicä kullanılsın ilaçların yapmasında nicä Evropa Birliindä,ölä dä Moldovada.
