Çadır kasabasında zanaat uçilişesindä geçti açık kapuların günü. Olay topladı okul üürenicilerini, anaları-bobaları, üüredicileri, biznes azalarını, erli kuvetleri hem halklararası partnörları.
Zanaat uçilişesi teklif eder uşaklara 14 zanaat. Açık kapular günündä okul üürenicilerindä oldu kolaylık üürenmää herbir zanaat için hem pay almaa interaktiv master-klaslarda.
«Pek beendim, çok meraklı işlär yapȇrlar kızlar, yaptık paskacık, kendimiz düzdük, pek meraklandım, bilmedim, ani burada bölä meraklı var nicä olsun».
«Biz geldik, burada gösterdilär çok zanaat pek beendim, bekim gelecäm burayı üürenmää».
Bölä olaylar yardım ederlär gençlerä annamaa hem ayırmaa o bölümü, angısı onnara taa yakın. Uşaklar görerlär nekadar önemni, lääzımnı hem islää üürenmää iş zanaatlarına, dedi zanaat uçilişesi başı Vera Balova: «Teklif ederiz ne biler bizim çocuklar yapmaa – kim bir yıl üürendi. Kim iki, kimi üç, göstersinnär, ani burada çok iş var nicä üürenmää, bitirdiynän da bizim şkolayı var nicä işä bireri gitmää, kazanmaa para. Çok bilerlär yapmaa».
Ayırı dikkatlık veriler halklararası partnörlarlan barabar çalışmaya. Burada bulundular Almaniyadan partnörlar, angıları nışannadılar ki üüretim kurumu üüsek uurda uzmannarı hazırlêêr.
«Biz yardım ederiz türlü bölümnerdä, ama sayȇrız, ani dual üüretmesi pek önemni, isteeriz onu ilerletmää burada, örnek gibi alıp Almaniyayı»,- Almaniyadan partnörlar nışannadılar.
Klaudia Hermes, Moldovada GIZ ofisin başı, nışannadı: «Bu pek önemni , neçinki lääzım genç çalışannar hepsi uurlarda, ki olsun aşçılar yada elektrikacılar, ama lääzım eni kreativ akıllı uzmannar».
Olayın kurucuları sayȇrlar, ani profesional-tehnik üürenmesi baş rolü oynêêr üüsek uurda kvalifikaţiyalı uzmannarın hazırlamasında.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!