Kazayak küüyün «Güneşçik» birinci uşak başçasında geçti olay adalı ana dili yortusuna. Hazırlamak grupanın üürenicileri annattılar şiirleri gagauz dili hem Ana toprak için, çaldılar gagauz dilindä türküleri, gösterip sevgiyi kendi kulturasına.
Yortuda şen uşak sesleri hem halk avaları öttülär. Uşakları terbi ederlär kendi halkını sevmää, ana dilini hem kulturayı, söledi uşak başçasının başı Tatyana Varban: «Uşaklara savaşȇrız göstermää, annatmaa, ilerletmää, zenginnetmää ana dilini. Uşaklar pay aldılar konkursta, gözäl annattılar şiirleri. Sanȇrım, ani bu kalacek onnarın akıllarında – bola gözäl olaylar yardım edeceklär unutmamaa ana dilini».
Hep bu gün uşak başçasında açtılar muzeyi, angısında gösterili türlü tertiplär. Onnarı dedelär kullanarmıştılar. Bu pek önemni, ki uşaklar görsünnär, meraklansınnar hem bilsinnär istoriyamızı, dedi gagauz dili üüredicisi Valentina Kalak: «Ȇksponatlarımız toplandı yıl-yıldan, azar-azar. Muzey lääzım olsun herbir uşak başçasında, neçinki görmedän, uşak annamȇȇr. Gördüynän, diidiynän o taa tutȇr akılında, geçirer onun içindän, evä da gittiynän, annadacek».
Uşak başçasında yortu adalı gagauz dilinä oldu önemni bir adım ana dilin hem adetlerin korumasında.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!