Üüretim ministerlii alarak esaba 2024-cü yılın bakalavra ekzamennerin sonuçlarını,devlettä olan liţeylerin reytingını kurdu. Bütündän Moldovada 312 liţey var. En ii 150 liţeyin sayısına Gagauz Erinin 10 üüretim kurumu girdi.Avtonomiyanın bu uurda başarıları için annadȇr bizim korespondentimiz.
Moldovanın Üüretim ministerlii alarak esaba devlet sessiyasının sonuçlarını, reytingını kurdu. Listedä 312 liţey var. Gagauz Erinin liţeylerin aarasında en üüsek uurda Kazayak küüyün liţeyi bulunȇr. O bu reytingta kırkıncı erdä bulunȇr. Bu kurumun başı D.Fazlı hem liţeyin başarannarı söledi, ani bu uura çıkmaa deyni büük kuvet koydular hem üürenicilär hem dä üüredicilär.
«Liţeyimiz üüsek uura çıktı. Şükür ederim herbir üüredicili, üürenicilerimiz ani birliktä çalıştılar. Bizim liţeyimiz bitkii yıllar üüsek uurlara çıktı. 2018-ci yıldan beeri hepsi başarannarımız ekzamenneri vererlär da diplomnarını kablederlär. Bıldır devlet reytingında Gagauz Eri liţeylerin arasında dördüncüydük. Bu yıl ilk erä çıktık»,- söledi Kazayak küüyün liţeyin başı Diana Fazlı.
Moldova uurunda 49 erdä Kongaz küüyün T.Zanet adına liţeyi. Onun başı Mariya Çebanova söledi. Kirsovo küüyün M.Tuzlov adına liţeyi 59-cu erdä. Bu 3 er Gagauziyanın uurunda. Üüüretim kurumun başı Oksana Razgradskaya şükür etti kolektivini hem başarannarı bu sonuçlar için.
«Bizim liţeyimiz başarılı olsun deyni kol-kola işledilär üüredicilär, üürenicilär, analar-bobalır. Bizim üüretim kurumumuzda birkaç boy becerikli hem bilgiç üüredici işler. Onnar üüretim hem üüretmäk proţesindä eni hem eski metodları birleştirerlär»,- Oksana Razgradskaya nışannadı .
«Üüredicilerimä büük saygı güderim. Onnar bana çok bilgi verdilär»,- ekledi başaran.
59-cu erdä Kongaz küüyün S.Demirel adına liţeyi. 66 erdä Komrat kasabasının G.Gaydarci adına liţeyi. 87 sıracıkta genä Komrat kasabasının M.Eminesku adına liţeyi. 104 eri Moldova reytingında aldı N.Tretyakov adına liţeyi. 110-cu erdä Valkaneş kasabasının «Luçafȇrul» liţeyi. 124-cü erdä D.Mavrodi adına liţeyi. 149-cu erdä Çadır kasabasının M.Guboglo adına liţeyi. Kurdu Üüretim ministerlii koleсlerin dä reytingını. 49 kolecin sayısından Komradın M.Çakir adına koleci, bu yılın bakalavra ekzamennerin sonuçlarına görä 4 eri aldı.
