Plannı mediţina baktırması- o salıı durumu bakmak, angısı geçer bakmayak var mı aalaşmaklar hastalıın belli etmesi için. Neçin lääzım kendi saalıını kontrol etmää üürendi Natalya Andrieş.
Plannı mediţina baktırmakları – saalıın profilaktikasının baş elementi. Onnar yardım ederlär taa erken belli etmää türlü hastalıkları, ölä nicä kalp hastalıı, diabet yada rak, eer ilk nışannar da yoksaydı. Doktorlar nasaat ederlär geçmää bölä baktırmakları bir keret yılda, nışannadı Komrat aylä merkez başın yardımcısı Valentina Fileva: «Var iki profilaktika baktırması, ki belli etmää sadä hem profesional hastalıklarını. Eer sizin işiniz zararlı, ozaman siz lääzım maasuz medik profilaktika baktırmayı geçäsiniz bakarak zarar kategoriyalarına da türlü uzmannarı geçirmää sıra geler. Medik baktırmayı, angısını aylä doktoru geçirer, o parasız, ama o baktırmak, angısı geçiriler, ki belli etmää profesional patologiyaları, geçiriler iş vericinin paralarınnan. Te bölä ayırılmak hem da aaraştırmakların sayısı da başka-başka».
Sadä, ama önemni aaraştırmaklar, ölä nicä kan analizi yada şeker uurun belli etmesindä analizi, önemni rolü oynȇȇrlar saalııkta hem hastalıkların belli etmesindä nışannȇȇrlar zanaatçılar. Plannı baktırmanın sayısı baalı insanın yaşlarına hem saalık durumuna. Nasaat ediler bakmayı terapevt doktorda bir keret yılda geçmää. Avtonomiya yaşayannarı da söleerlär, ani plannı medik baktırmayı lääzım geçmää.
«Lääzım vermää, bolay annamaa, nesoy hastalık var sendä dä vakıdında onu ilaçlamaa».
«Lääzım geçmää. Da bu kendi için, diil vraçlara. Sän kendi saalıını bakȇrsın. Sän bakmayacan saalıını, sana kimsey gelmeyecek deysin- git ilaçlanmaa. Yok ne söleyim».
«Lääzım. Biz ihtiarladık şansora. Gençlär taa aaz hastalanȇr. Biz ihtiar, işledik çok. Şindi ilaçlanmaa isteeriz».
«Flürografiya iki keret yılda lääzım geçmää, sora analizleri vermää. Bu kendi için, profilaktika için lääzım yapmaa. Sora geç olȇr, da yok ilaçlanmak. Bän yılda bir keret yapȇrım. 65 yaşındayım. Allaha şükür, saalıklı gibi görünerim».
Doktorların daymaa dolaşması yardım eder belli etmää türlü hastalıkları erken, açan ilaçlanmak taa faydalı.
