Çok-Maydan küüyündä büük düzüntücülük işlerindän sora F.Yanioglo adına liţeyindä sport salonu açıldı. Bu olay yortu gibi oldu üürenicilerä, üüredicilerä hem ana-bobalara. Açılışta bizim televizion grupamız da bulundu.
Büük düzüntücülük işleri F.Yanioglo adına liţeyindä-üürenmäk kurumun ilerlemesinin önemni adımı. Büünkü gündän sora uşakların sportlan zanaatlanması zamandaş hem uygun koşullarda geçeceklär. Sport salonunda enilendilär erlär, duvarlar, sport avadannıkları satın alındılar.
«Sport salonu pek gözäl. Pek gözäl düzmüşlär. Toplar eni, basketbol avadannıkları koyuldular. Pek islää, gözäl».
«Bän şansora gördüm salonu, pek gözäl olmuş, fizkulturadan kaarä zanaatlanȇrız basketbollan, gimnastikaylan hem voleybollan. Saa olsunnar, bu gözäl remont yaptıkları için».
«Bän pek severim basketbolu hem gimnastikayı, bek sevinerim, ani eni salonda sportlan zanaatlanacam».
Enilenmiş salonun açılışında pay aldılar Region öndercileri, erli kuvetlär, üürenicilär, liţeyin uzmannarı hem ana-bobaları. Bu uura merkez komponenttän 850 000 ley verildi. Gagauziya Başkanı Guţul Evgeniya çizgiledi uşakların ilerlemesi hem saalıkları için sport önemini hem ii başarıları onnara diledi.
«İsteerim sölemää Natalya Kristevaya çok saa olsun, angısının canı acıyȇr bütün Gagauziyanın liţeylerinä. Yapȇr hepsiciini, ani beki küçüäk proektlär, ama onnar olsunnar herbir şkolada.Şükür ederim HT deputatını, bän bilerim , ani onun raametli bobası çok yardım edärdi okula hem küüyä. Çok saa olsunnar üüredicilär, ani veresiniz bizim uşaklarımıza küçüktän motivaţiya sport için, çünkü herbir iş bilgilerdän hem disţiplinadan başlȇȇr»,- çizgiledi Gagauziya Başkanı.
Küüyün primarı Oleg Konstandoglo nezamansa bu liţeydä üürenmiş. Açıkladı kendi umudunu, ani bu sport salonunda işleyän uşaklar eni uurlara çıkabileceklär.
«Pek sevinerim sport salonumuzu bu halda görmää. Saa olsun Bakannık Komiteti, küüyümüzün deputatı. Bu investiţiyalar geleceemizä yapıldılar. Umutlanȇrım, ani başkannan küüyümüzdä gerçeklenän proekt son olmayacek. Saaolunuz. Umutlanȇrım, ani bu sport salonu büük hem çok başarıları küüyümüzä getirecek»,- küüyün primarı çizgiledi.
Liţeyin başı şükür etti herbirini, kim kaçındı hem kuvet koydu bu proektin gerçeklenmesinä.
«Saygılı üürenicilär, bu sport salonu sizin için. Biralay kişi işledi, ani sizä olsun komfort çalışmaa burada hem da zanaatlanmaa sportlan. Umut ederim, ani bu sport salonu olacek merkez komanda ruhunu terbietmektä, saburluk terbietmesindä. Olasınız taa kaavi, taa çalışkan hem taa saalıklı»,- Çok-Maydan küüyü F.Yanioglo adına liţeyin başı Valentina Ştiroy çizgiledi.
Eni salonun açılışı uşaklara sportlan zanatlanmaa ihlam verecek. Bundan sora uşaklarda taa çok kolaylık sevdii sport çeşidini ayırmaa olacek, nışannadı Gagauziya Üüretmäk bakanı Natalia Kristeva: «Elbetki, biz annȇȇrız, ani uşaklara sportlan zanaatlanmaa deyni uygun koşulların yapılması pek önemni. Bakannık Komiteti teklif etti, HT destekledi Gagauziyanın 3 sport salonun düzülmesini. Sade annaşmaklan bölä proektlär uygun hem başarılı olȇrlar».
Liţeyin fizika kulturası üüredicisi Vladimir Gorelko nışannadı, ani bu proekt okulda sportun ilerlemesi için pek önemni hem eni kolaylıykları açacek.
«Saa olsun Bakannık komiteti, HT, liţeyin öndercilii, ani bölä önemni soruşları açıklȇȇrsınız. Sport — o önemni bir iş, çünkü evladlarımız bizdän taa kaavi olsunnar lääzım»,-urguladı üüredici.
Açılışın ofiţial payından sora üürenicilär sport uurunda kendi becermeklerini musaafirlerä gösterdilär.
Avtor: A.Terzi, operator: S.Georgiev, montaj: İ.Rezuneţ