Çeşmäküüyü-Etuliya yolun düzülmesi başa çıkarıldı. Paralar düzmäk işlerinä verildi Gagauziya bücetindän. Gagauziya Başkanı Evgeniya Guţul baktı yapılmış işlerin kalitelerini.
Çeşmä hem Etuliya küüyüleri baalayan yolun düzülmesi çok yıl geçirilmedi da bulunardı zor durumda. Evgeniya Guţul nışannadı, ani proekt pek önemli bu küülerin yaşayannarı için, neçinki bu yol baalȇȇr onnarı başka küülärlän.
«Bu yol çok önemli insannara, angıları yaşȇȇr Tülü küüyündä hem da Çeşmä küüyündä. Taa da çok Çeşmä küüyün uşaklarına, angıları üürenerlär liţeydä Tülüküündä, onnar her sabaa, avşam üstü gezerlär bu yolda. Bu yol pek kötüydü, yok nasıldı geçmää arabalarlan bu yolda. Saa ol Halk Topluşun deputatlarına, angıları seçtilär, kayıl oldular, ani bu yol olsun»,- nışannadı başkan.
17 bin kvadrat metrasında yol işçileri yaptılar temeli hem döşedilär iki sıra asfalt. Yakında yolun kenarları kaavilnecek.
«Yolun düzülmesini başa çıkardık. Şindi kenarlarını kaavilederiz, yol nışannarını koyacez, yol bütünä hazır olacek»,- Gagauziya düzmäk hem ifrastruktura bakanı Sergey Bolgar çizgiledi.
Bütünnä proektin paası tutȇr 11 million ley, finanslar verildi Gagauziyanın bücetından. Yolun uzunnuu 2 kilometra 900 metra kurȇr.
Avtor: O. Duloglo, operator hem montaj: L. Arfanos