Moldovada her yılın Harman ayın ilk aftasında nışannanȇr güüslän doyurmak aftası. Onu geçirer Saalık Ministerlii Dünnä Saalık Kurumun yardımınnan.
Güüslän doyurmak aftanın suresindä bütün Moldova devletindä geçerlär türlü toplantılar, seminarlar, neredä bakılȇr güüslän doyurmanın faydası uşaklara deyni. Ana süüdü küçük uşacıklara deyni ideal imäk, angısı verer hepsi lääzımnı vitaminneri, ani uşak büüsün saalıklı. Uzmannar nasaatlȇȇrlar doyurmaa uşaa ana südünnän onun duumasının ilk saatlarından taa uzaltmaa onu uşaan 2 yaşına kadar. Uzmannar çizgilerlär, ani güüslän doyurmak onemni diil sadece uşaan saalına, ama ananın da.
«Ana südü – en besleyici hem faydalı imäk, uşaa deyni. Onsuz zoor saalıklı büüymää hem geliştirmää… Bu en yakışıklı, en uygulu imäk uşacıın barsaklarına deyni»,- uşak doktoru dedi.
Hiç bir da kuru karışım yakın durmȇȇr ana südünä. Sadece ana südü en uygun uşaan başarılı fizika büümesinä, onun güüdä hem akıl geliştirmesinä. Sadece o kooruyȇr genç güdeyı hastalıklardan.
«İmäk resurstan kaarä ana südü o bir kaavi koorumak resursu. Süttä var türlü vitaminnar, A hem G grupanın imuno-globulinnarı, angılar bakteriyalardan hem infekţiyalardan kooruyȇrlar. Girip uşan güdesinä uşak kableder hazır hem pek bir kaavi natural koorumasını.Hepsi karışımlar uşaklara deyni — olursa onnar uygun dozada, yada en üüsek kalitedä, südä çok benzeyän — ana süttän taa kaavi koorumak yok, çünkü hiç bişey vermer o imuniteti, angısını verer güüslän doyurmak ana»,- nışannadı Vitaliy Mavrodi.
Uzmannar nışanȇrlar, ani güüslän doyurmak iisirler riskı hastalanmaa güüs kançerlan. Вundan kaarä, doyurarkan güüslän, ana hem uşak arasında peydalanȇr bir aıyrı duygu baalantı.
«Uşaa deyni güüslän doyurması taa faydalı, ana südü ilk uşaan altı aylarında verer imunitet, kooruyȇȇr alergiyadan, taa hızlı keblediler uşaklan. Duygular da, elbetki, farklı. Bu analık duyguları, duyȇrsın, ani sän ana, ani bu senin paycaazın».
Güüslän doyurmanın taa bir önemnii var — uşaa herzaman yakışȇr problemasız doyurmaa — burada hem şindi. Ana südü diil lääzım yısıtmaa, diil lääzım şişelerä sterilizaţiyä yapmaa hem karıştırmaa karışımları. Doktorlar çizgilerlär, ani ana südü o en ilk hem en ii iş, angısını ana yakışȇr versin kendi uşaana onun yasamanın ilk yıllarında.
