Gagauz Erin 8 okulunda üüretmäk proţesindä zamandaş tehnologiyalarını kullanȇrlar. Bu Clasa viitorului proektin sınırlarında yapılȇr. Bu proţes taa başarılı olsun deyni bu okullardan 39 üüredici seminara katıldılar, neredä kendi becermeklerini gösterdilär hem dä zamandaş tehnologiyaların taa geniştän derslerdä kullanılması için eni ideyaları kurdular.
Praktika seminarı faydalı oldu. Derslerindä zamandaş tehnologiyaları kullanan üüredicilär biri-birinnän görgülerinnän paylaştılar. İnstrumentlerin arasında mini-robotlar, VR-gözlüklär, ţifra mikroskoplar.
«Tehnikamız çok var. Onnarı kullanmaa deyni dä çok kolaylık var. Üüüredicilär kendileri kararlȇȇrlar, nesoy bu tehnikayı kullanmaa: himiya, fizika, matematika derslerindä hem elbetki başlankı klaslarda»,- dedi üüredici.
Üüredicilär türlü ideyalarınnan paylaştılar. Hem söledilär, netürlü üürenicilär severlär bu dersleri.
«Üürenicilär büük havezlän zamandaş tehnologiyalarını kullanȇrlar»,- söledi G.Gaydarci adına liţeyin üüredicisi.
Üüredicilär birliktä üürenicilärlän türlü shemaları kurȇrlar. Bu shemaların yardımınnan uçurdakları uçurdȇrlar. Küçük robotları maasuz marşrutlarda gezdirerlär.
«Büük motivaţiya var. Okulda taa çok zaman geçirerim. Zamandaş tehnologiyalar beni pek meraklandırȇrlar. Bän hem benim dostlarım pek sevineriz, ani bölä kolaylıımız var»,- dedi üüredici.
Zamandaş tehnologiyaları praktikada kullanarak, üürenicilerin fikir becermekleri ilerleer, kritika düşünmekleri zenginneşer. Onnar İT uurunda becerikli olȇrlar, çizgileerlär üüredicilär.
«Clasa viitorului proektin sınırlarında herbir okul kendi istediinä görä tehnikayı seçti. Proekt hep taa var, o ilerleer, er başka bir tehnika lääzımsa, onu almaa var nasıl. Pek isteerim, ki bu proektä Gagauz Erindä taa çok okul katılsın»,- dedi Kristeva.
Okullarda zamandaş tehnologiyaların kullanılması — gelecää yapılan bir adım. Avtonomiyada inanȇrlar, ani bu diişmeklär üüretmäk proţesini taa kaliteli yapmaa yardım ederlär.
Moldovanın hem Gagauziyanın en mekalı haberleriGRTnın Telegram kanalında!