Moldovada işlär netürlü ilerleyeceklär – bu soruşu, alarak esaba prezident seçimnerin hem referendumun sonuçlarını, «Dialog studiyada» programamızın musaafirlerinä verdik. İki yurist: D.Kiseev hem İ.Yanak kendi bakılşarını açıkladılar.
Prezident seçimnerin ikinci turu noyabinin 3-dä geçecek. Katılacȇk iki kandidat: M.Sandu hem A.Stoyanoglo. İnsannar lääzım iicä düşünüptä seslerini versinnär, söledi «Seçenek hem alternativa Gagauziyaya deyni» cümnä toplantısının başı İgor Yanak: «İnsannarın sesleri hepsini gösterecek. Bu en önemni. Politikacılar var nicä hertürlü bakışlarda olsunnar, ama seçer onnarı insane».
Yurist D.Kiseev sayȇr, ani bitki vakıt insannar taa cuvaplı oldular. Ama ses verärkän onnar en ilkin kandidatın insannık kalitelerini esaba alȇrlar, da sade sora onun seçim programasını bakȇrlar.
«Var politika partiyaları. Er onnar sölediyselär, ani onnar bu kandidatı inanȇrlar, insan da onu inanȇr, hem ona sesini verer», — söledi D.Kiseev.
Kim dä olmasa devletin başında, o mutlak kendi adamaklarını gerçekleştirsin lääzm, sayȇr İ.Yanak. O urgulȇȇr, ani insannar bekleerlär, nezaman Moldovada soţial hem politika durumnarı taa ii olacȇklar.
«Politikacılar diil lääzım populizmaylan zanaatlansınnar. Onnar işlesinnär lääzım, çünkü var nasıl olsun ölä, ani insannar umutlarını kaybedeceklär dä gelän seçimnerdä pay almayacȇklar»,- İgor Yanaksöledi.
Prezident seçimnerinin ikinci turu noyabrinin 3-dä geçecek. Katılacȇk iki kandidat: M.Sandu hem A.Stoyanoglo. GRT genä politika debatlarını geçirecek. Angı gün hem kaçta bu debatlar efirä çıkacȇklar GRT bu yakınnarda haber verecek.
