Eni yıl hem kolada yortuları o vakıt açan onu var nasıl geçirmää kendi yakın insannarın hem dostların yannarında, oturup sofralara türlü imeklärlän. Da yanvar ayın ilk aftasında ölä da olȇr. Bü günnerdä biz çok hem da sık iiyeriz. Ne lääzım yapmaa, ki güüdemizä zarar bölä imeklerdän olmasın, üürendi Natalya Andrieş.
«Çorbacıykaların çoyu isteer sevindirmää yakın insannarını türlü imeklärlän. Ama onnar diil herzaman faydalı saalık için. Yortulu masalarda oturmak var nasıl birkaç gün sürtsün, da oradan yok nasıl sebepsiz gitmää. İnsanın saalıı yortulu imeklerdän yufkalȇr», — söleer Komrat poliklinikasının aylä doktorlar merkezi başı İrina Todorova.
«İlkin bu katı hastalıı- pankreatit, açan etişmeer ferment, angısı katıya düşer, da islää işlettirilmeer. Da bu getirer kusmaya, ürään acımasına hem başka nışannara, angıların beterina bolniţaya düşmää var nasıl»,- ekledi Todorova.
Herbir yortunun altın kuralı- herbir imektän biraz-biraz daatmaa. Oturup yortulu sofraya, tutun aklında, ani çok imää diil lääızm, lääzım biraz hepsindän daatmaa, urgulȇȇr doktor.
«Yortu için eer siz onu evdä bakarsaydınız, en islää imekleri kendiniz yapasanız, da herbirindän biraz. Bizim insannar anılȇrlar onunnan, ani onnarın sofraları herzaman üklü türlü imeklärlän. Bu bekim da islää, açan yok nereyi farfiriyi koymaa, iki- üç kat türlü imeklär durȇr, angılarını sora imää lääzım, neçinki onnar bozulaceklar, sıbıtmaa da canın acıyȇr. Da bu var nasıl getirsin türlü zorluklara»,- nasaat eder Todorova.
Ki Eni yılın hem Kolda yortuların bakması halizdän getirsin sevinmelik hem ii kef, lääzım türlü kuralları esaba almaa, nışannadı İrina Todorova.
«Oturarkan türlü sofralara, lääzım ilkin eterli sayıda su içmää, ki böbreklär islää toksinnarı çıkarabilsinnär. Lääzım taa çok salata imää, ama en çok eşil, nereyi girer — laana, yaprak, hıyar»,- sayȇr doktor.
Yortulu sofralarda iiyin sade o imekleri, angılarını siz seversiniz, sölуer İrina Todorova. Tutunuz aklınızda, ani tuzların hem yaaların kullanması var nasıl getirsin üüsek tansiona. Bölä da durum var nasıl gösterilsin kalpta hem da damarlarda. Bundan kaarä peydalanȇr korkunç gipertoniya krizların hem kalp hastalıkların olmasında, nışannadı doktor.
