Gagauziyada çeketti «Yılın en ii terbiedici- 2025» konkursu. Onu kurdu Gagauziya üüretmäk bakannıı. Büün kendi becermeklerini gösterdilär terbiedicilär, ama sabaa konkursa katılaceklar liţeylerin hem gimnaziyaların üüredicileri. Bu olay verer pedagoglara kolaylık göstermää kendi profesional becermeklerini hem kazanmaa ödülleri hem kolegalardan hatırlamayı.
Bu yıl konkursa «Yılın en ii terbiedicisi» katıldı 18 terbiedici. Bu rekord bir sayı. Konkurs üç etaptan kurulu – portfolio hem anketaların temsil etmesi, açık uroklar hem master- klaslar. Gagauziya üüretmäk bakanı Nataliya Kristeva nışannadı bölä konkursların önemniini pedagogların aralarında. Onun laflarına görä bölä olaylar yardım ederlär kolektivi birleştirmää. O umutlanȇr, ani pay alıcıların herbiri gösterecek kendisini en ii taraftan hem açıklayacȇk kendi becermeklerini.
«Herzaman belli ederiz, ani bu konkurs nesä diiştirer onnarın yaşamasında. Onnarda peydalanȇr kolaylık kendi karyerasını üüseltmää, onnar taa kreativ hem girgin olȇrlar. Elbetki, büün onnar dalgalanȇrlar, ama kimsey onnardan pişman olmayacȇk , ani katıldılar bu konkursa. Bundan kaarä, bizdä bitki yıllar üüredicilär ikinciliya hem üçncülüya konkursa gelerlär, neçinki isteerlär taa bir keret kendi kuvetlerini denemää»,-nışannadı üüretmäk bakanı.
Komrat kasabasının altıncı uşak başçasının logopedı Natalya Meşa nışannadı, ani bölä konkurslar – bu pek islää kolaylık diil sade kendi kaavi taraflarını göstermää hem kendi korkularını yok etmää, ama tanışmaa kolegalarınnan. Natalya urguladı, ani pek önemni korkmamaa da gitmää sade ileri, açıp eni kolaylıkları.
«Bän neetlenerim kabletmää ii havezi konkursun etaplarından, becermekleri kazanmaa, eni tanışmakları, konuşmaları. Bu herzaman faydalı hem lääzımnı yaşamakta. Diil lääzım korkmaa, lääzım ileri gitmää hem taa becerekli olmaa»,- paylaştı duygularınnan pay alan.
Bu yıl jüri azası oldu Çadır 8-ci uşak baçşası terbiedicisi Ekaterina Kojokar, angısı geçän yıl aldı ikinci eri respublika konkursunda «En ii terbiedicisi – 2024». Ekaterina söledi, ani pek islää annȇȇr konkursun pay alıcılarını, neçinki nezamansa onnarın erindä bulunardı. O sayȇr, ani korku- bu en büük köstek, angısını geçmää lääzım. Ekaterina hepsinä başarları adadı da nışannadı, ani bölä konkurslar getirerlär ii hoşluklara hem faydalı çıkışlara.
«Siz lääzım kendi duygularınızı elinizdä tutasınız, neçinki onnar sizi dolaştırȇrlar hem yaşamanızda, hem zanaatınızda. Bu herzaman bizdä, karılarda, var. Ama isteerim sölemää, ani yarışmakta pay alması verecek sizä inan kendi kuvedinizä, kendi aylenizä hem kolegalarınıza»,- nasaat verdi Ekaterina.
Konkursun enseyicileri para premiyalarını kabledeceklär — 10 bin ley ilk er için, ikinci er için — 8 bin ley hem beş bin ley üçüncü er için. Finalistlär hep ölä baaşışları kabledeceklär- ikişär bin ley. Ama enseycilär premiyalardan kaarä ikinci didaktika uurunu kabledeceklär.