Yaz- o dinnenmäk vakıdı, açan insan var nasıl kendisi ayırsın, nicä onu geçirmää hem yapmaa o işleri, angılarını o sever hem onna interesli. İnsan annattı, neredä hem nicä var nasıl vakıdı Komrat kasabasında geçirmää.
«Açan bendä var serbest zaman, bän kendi köpeklerimnän park içindä gezinerim. Kasabaya çıkȇrım».
«İslää vakıdı geçireriz. Dinneneriz. Te gideriz putövkayı almaa denizä».
«Evdäyim, neredä biz var nasıl olalım. Herbir insan serbest zamanında evdä bulunȇr. Bölä sıcakta çok iş var. Yatersın divanda ventilätora karşı».
«Ayläylän dinneneriz, baseynayı doldurȇrız- da yıkanȇrız. Savaşȇrız sıcaktan saklanmaa».
«Serbest zamanında çıkȇrız, dostlarlan buluşȇrız. Kiyat okuyȇrız, ilerleriz».
«Dostlarlan toplanȇrız, oturȇrız dinneneriz, konuşȇrız, tanışȇrız sora genä konuşȇrız».
«Gelerim Komrada drujkalarlan gezinmää. Bän taa çok dostlarımnan kasabada gezinerim, neredä-sä oturȇrız».
«Serbest zamanı park içindä geçirerim, neredä var nasıl oturmaa, avşamnen da gezi yaperız. Taa çok dostlarlan birerdä».
«Bän lisapettä gezinerim, sportlan zanaatlanȇrım, trenirovkalara gezerim».
«Drujkalarımnan buluşȇrım gezineriz, neredä sä oturȇrız. Meydanda gezineriz».
«Nicä olȇr ölä da geçireriz. Maşınada ötä buyanı gezeriz, balık tutmaa gideriz»
«Uşaklarlan geçirerim vakıdı unukalar geler».
«Bendä serbest vakıt üülendä peydalanȇr açan dışarı yok nicä çıkmaa. Bunun için taa çok vakıdı telefonda geçirerim, kiminän sa lafederim. Birbişey imää yapȇrım».
«Pek islää ayläylän, dostlarımnan. Muzıkaylan zanaatlanȇrım. Var gagauz ansamblisi Korobeyniki, repetiţiyaları geçireriz, hazırlȇȇrız konţert programalarını Komratta».
«Serbest zamanım may yok, neçin ki yılın sonunadan hepsi yazılı pek önemni olaylar, ama peydalanarsaydı vakıt ozaman bän aktiv dinnenmeyi ayırȇrım».
Yaşayannar hep ölä urguladılar, ani kasabada kultura hem sport olaylar geçirilerlär.
«Bän düşünerim, ani gençlär için var erlär, neredä dinnenmää. Ama onarı hepsini ilerletmää lääzım. Elbetki, herzaman var neyä etişmää. Hepsi islää».
Soruşturan insannarın kimileri sayȇrlar, ani kasabaya lääzım dinnenmäk için infrastruktura.
«Park zonalar hem uşaklar için meydannar, lääzm taa çok olsunanar , neçin ki uşaklar kaçınȇrlar fontan içindä yıkanȇrlar. Da insan diil lääzım çıplak uşaklara baksın parkta. Eer olaydı bir diil büük baseyn uşaklar için onnar orada yıkanacȇydılar yaz zamanında. Park bizä etişmeer. Pek çok insan parkta toplaner. Lääzım ayırı zonalar dinnemek için olsunnar. Var nicä kasabadan dışarı masalarlan, skaunnarlan, göl yanında yada üç pınar erindä, makarki da orada paklanmȇȇrlar».
«Kinoteatr lääzım olsun, neçin ki herzaman Kişnöva gitmää kino bakmaa diil yakışıklı».
«Taa çok er dinnemäk için Komratta olsun lääzım. Nesä eni olsun».
Soruşturmak gösterdi, ani yaşayannar severlär türlü dinnenmeyi hem da serbest zamanını isteerlär interesli geçirmää.
