Kompensaţiyaları energiya için bu yıl paraylan bank kartalarına yada poçtada vererlär. Kompensaţiyalar kasım ayından mart ayınadan verileceklär.
Kompensaţiyaları vermäk için hem onnarın sayısını herbir çorbacılık için karar ayırı kablediler hem çekiler ayledä yaşayan insannarın sayısından, statusundan, gelirlerin sayısından hem başka faktorlardan.
«Biz belli ettik, ani yakın 634 bin çorbacılık kasım ayı için kompensaţiyaları kabledeceklär. Laf gider danışannarın 90%-di için. Bu nışannȇȇr, ani 634 bin çorbacılıkta yaşȇȇrlar 1mln.283 bin insan, angıları kompensaţiyaları kabledeceklär»,- nışannadı Buzu.
Bu yıl kompensaţiyaların sayısı başlȇȇr 300 leydän , nışannadı ministru.
«Bu 634 bin çorbacılıktan 237 bin 383 çorbacılık 800-är leylik kompensaţiyaları kabledeceklär. Bu aylelerdä 89531 kişi yaşȇȇrlar. Kalan 396 629 çorbacılık için kompensaţiyaların sayısı 300-dän 800 leyädän kuracek. Kasım ayında bu uura 334 mln. ley Hükümetlän verilecek»,- ekledi ministru.
Gagauziya yaşayannarı şansora kablettilär haberlemeyi onnara verilän kompensaţiyaların sayısı için.
«Verdim da ne, bana 300 ley koymuşlar. Geçän yıl 1300-1200 kabledärdim, bu yıl sa ne?».
«Ne bu kompensaţiya. Sayȇrım, ani bişey.Taa ii hiç olmaydı, nekadar 300 ley. Geçän yıl 800 leydi, bu yıl sa 300».
«Bän Ostap Bender gibi cuvap verecäm: «Bizä Evropa yardım edecek».
«Bän 800 ley kompensaţiya kablettim. Kompensaţiya yardım eder».
«Geçän yıl danıştım, ama kabletmedim, bu yıl 300 ley kablettim».
«Hem geçän yıl, hem bu yıl danıştım, ama bu yıl faydası az. Geçän yıl kompensaţiyaylan gazın paası 12 ley çıkardı. Bu yıl sa verdilär 300 ley sade».
«Bän oolumnan barabar yaşȇȇrım, 300 ley kablettim. Gaz fakturası sa 5 binnik geldi».
Kompensaţiyalar bu yıl para gibi bank kartalara yada poçta bölünmerindä verilerlär. Kompensaţiya mart ayınadan verilecek.
