Çadır kasabası yaşayanı, Çadır-Lunga istoriya muzeyin öndercisi Stafanida Stamova kendi hergünkü işinnnän dedelerimizdän kalan istoriyayı toplayıp, koruma savaşȇr.
Stamova Stefanidayı Çadırda herbiri biler. O Çadır-Lunga istoriya muzeyi öndercisi. Küçüklüündä Stefanida Dmitrievnayı anası bilgiya sevmäklän terbietmiş.
«Üürenmäk, bibliotekaya gitmäk. O beni 6 yaşımda bibliotekaya getirip, yazdırdı. Bän taa okumaa bilmäzdim, ama o bana okuyardı, kendisi da pek okumaa sevärdi. Duuma günnerimä herkerä kiyat baaşlaardı. Herkerä söläärdi, ani en büük baaşış-kiyat. Hem çizgiläärdi, ani üürenmäklän başka yaşamak olȇr»,- Stamova Stefanida nışannadı.
Üürenmesini başardıktan sora Stefanida Stamova kararlȇȇr kendi Ana topraana geeri dönmää, da 17 yıl sıravardı kasaba bibliotekasında izmet eder. 2002-ci yılda ama ona kasabanın muzeyindä iş teklif ederlär, da ozamandan beeri onun yaşaması dolayımızın istoriyasınınnan sıkı baalanȇr.
«2000-ci yılda bana yaklaştı primarın yardımcısı Dariy Nina İvanovna, o vakıt muzey var nasıl demää, ani yoktu. Muzey depremdän sora yıkılmıştı da hepsi işleri, ne vardı, topladılar bir küçücük odaya da bir neet vardı-yapmaa Çadırda bir muzey»,- açıkladı Stefanida.
Stefanida Dmitrievna nışannȇȇr, ani o yıllar pek zordular, ama büün sevindirer o, ani büünnän-büün sergennär taa zeedelenerlär, yaşayannar da bu işä aktiv katılȇrlar.
«Getirerlär, vererlär, baaşlȇȇrlar muzeyä parasız. Çoyu bu eksponatları biz insannardan parasız aldık. İnsan deer ölä-bän kullandım bu işi, gençlär bekim onu tutmayacek, kullanmayacek olsun muzeydä. Gençlär da getirerlär o işleri, angıları kalȇrlar ana-bobadan. Burada bizdä bir eşil gelin fistanı var, insan kendi anasının fistanını getirdi»,- açıkladı Stefanida.
Büün muzey sergenneri dolu, eksponatların sayısı 5 bindän zeedä. Hepsi onnar tenä-tenä büük sevgiylän toplanılȇrlar hem korunȇrlar.
Avtor: A. Terzi, operator: G. Stavilov, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!