Komrat kasabasında G.Gaydarci adına liţeyindä yardımnamak yarmarkası geçirildi. taa geniştän süjetimizdä.
G.Gaydarci adına liţeyindä her yıl yardımnamak akţiyası geçiriler. Üürenicilär getirerlär evdän türlü işler: bijuteriya, resim, kiyat, oyuncak, ruba. Hepsi bunnar satılȇr. Liţey direktoru işini yapan Olga Kara söledi, angı neetlän yarmarka geçiriler.
«Bu yarmarkaya katılȇrlar bizim üürenicilerimiz hem onnarın anaları-bobaları, katılȇrlar üüredicilär dä. Onnar getirerlär nesa satmaa deyni. Bundan kaarä kendileri dä beendi işleri satın alȇrlar. Butakım para toplanılȇr»,- nışannadı üüretim kurumun başı.
Üüüredicilär urguladılar, ani paraları onkologiya dertlerinnän hasta olan uşaklara vereceklär.
«Yarmarkanın her yıl kendi özel neeti var — iilik yapmaa. Bu yıl biz yardım ederiz uşaklara, angıların ilaçları pek paalı. Biz onnara yardım ederiz. Butakım biz bizim üürenicilerimizi cana yakın olmaa üürederiz»,- dedi üüredici.
«Yarmarkamızı üçüncülää geçireriz. Bu sıra onun uuru taa üüsek. Çok insan katılȇr. Elbetki bu olay uşakları dooru terbieder. Onnar iilik yapȇrlar, annȇȇrlar, neçin busoy olaylar önemni. Biz göreriz, ani burada çok büük insan var. Uşaklar onnardan örnek alȇrlar. Butakım biz evlad boylarımızı terbiederiz»,- nışannadı Oksana Sarı.
«Bizim yarmarkamız artık bir adet oldu. Uşaklar, analar-bobalar büük havezlän katılȇrlar. Kimsä bişey getirmeer, ama kuvedinä görä para verer. Sayȇrım, ani busoy olaylar terbiederlär insannık kalitelerini uşaklarımızda. Onnar cana yakın, acızgan olȇrlar. Aalemin kahırını annamaa başlȇȇrlar. Hem yardım etmää üürenerlär»,- ekledi üüredici Mariya Popozoglo.
Analar-bobalar hem üürenicilär akţiyaya havezlän katıldılar.
«Bu faydalı bir olay. Nasaat ederim, ki herbiri katılsın. Helal hepsinä: üüredicilerä, üürenicilerä, analara-bobalara».
«Büük bir iş yapılȇr. İmunodefiţitlan hasta olan uşaklara yardım olacȇk. Onnarın dertleri pek aar».
«Bu pek islää iş. Bu uşaklara bizim yardımımız lääzım».
«Paralarlan hasta uşaklara yardım edecez. Önemni akţiyaya katılmaa.»
«Biz bu uşaklara yardım etmää bütün ürektän isteeriz».
«Mutlak lääzım bu akţiyaya katılmaa. Butakım biz onkologiyaylan hasta uşaklara ilaçlanmak için lääzım olan paraları toplamaa yardım edecez».
«Butakım uşaklarımızı cana yakın, iilikçi olmaa üürederiz. Onnar lääzım üürensinnär yardım etmää».
Üüredicilär hem üürenicilär söledilär, ani var neetleri ötää dooru da bu akţiyayı geçirmää.
Avtor: V.Çoban, P.Slavova, operator: V.Kıssa, montaj: A.Topal