VİÇ hastalıın profilaktikasınnan baalı olay geçti Çadır kasabasında. İnsannar, kim istedi, testları verdilär, ki annamaa kendi saalıın durumunu. Bundan kaare onnara haberledilär, nicä korunmaa bu hastalıktan.
Önemni akţiyayı hazırladı «Împreuna pentru viaţa» soţial merkezi o neietlän, ki insannara taa derindän annatmaa hem taa çok haber vermää VIÇ-hastalıı için. Üüsek uurda bu olayda pay aldılar Komrat Mihail Çakir adına kolecın dördüncü kursun studentleri, angıları üürenerlär «soţial yardımcıları» zanaatına. Student Igor Grozdev nışannadı bu akţiyanın baş neetini.
İgor Grozdev, student, nışannadı: «Bizim bu akţiyanın baş sebepi- annatmaa insannara onu, ani pek önemni testları geçmää, ki üürenmää VIÇ-statusunu. Lääzım yılda makar iki keret kontrol etmää kendini. Kampaniyanın sloganı bölä — inää çuval içindä saklamıcan» .
Akţiyanın pay alannarı insannara daattılar informaţiya broşüralarını hem derindän annattılar, nekadar önemni vakıtçasına diagnostikayı geçmää. Hep burada hepsinin ,kim istedi, oldu kolaylıkları express-testi versinnär, ki üürenmää VIÇ-statusunu. İlk bunu yaptı Olga Çimpoeş — Çadır probaţiya bölümün uzmanı.
Olga Çimpoeş, Çadır kontrol bölümün başı, söledi: «Biz geçeriz büün express —testları hem annadêrız kasabanın yaşayannarına bu problema için. Anndêrız, ne lääzım yapmaa, ki bu hastalıı ensemää. Bu pek önemni, biz çalışêrız ölä kişilärlän, angıların var saalıklan problemaları, onnarın arasında VIÇ , tuberkulöz, gepatit. Yazık, ama onnarın çoyunda yok kolaylık danışmaa vakıdında bolniţaya. Onuştan express -test pek önemni yapmaa, o parasız».
Poliţiya uzmannarı da bu olaya katıldılar. Çadırın poliţiya bölümün azası Tatyana Kunçeva nışannadı, ani diil bir yıl onnar çalışêrlar «Împreuna pentru viaţa» merkezinnän.
Baş ofiţer Tatyana Kunçeva söledi: «Her yıl biz geçireriz bölä olayları Çadırda hem Çadır dolayında barabar probaţiya bölümünnän. Neçin bu önemli? Neçin ki biz işleeriz insannarlan, angıları risk grupasında bulunêrlar. Bu akţiyalar onnar için pek faydalı, çünkü var kolaylık parasız hızlı geçmää testı ga üürenmää çıkışları. Var insannar, ani hastalanêrlar, bilmeerlär, yaşêêrlar, da var nicä ulaştırsınnar başkalarını, da onuştan lääzım korumaa saalıını hem düşünmää gelecek için».
JUST TEST için,angısını milli kampaniyası giriştirdi, annattı «Împreuna pentru viaţa» soţial merkezin psihologu Tatyana Nesterova. QR koduna basıp, var nicä üürenmää pek çok önemni işleri VIÇ-hastalıı için. O hep ölä haberledi, ani sıradakı akţiya Komratta geçecek.
Tatyana Nesterova, psiholog, annattı: «Taa bir akţiya olacek Kıran ayın onunda, meydanda.Onuştan, kim geçmedi testi Çadırda, gelin Komrada. Ama nicä urgulandım, hêştêga görä geçip, var nicä çok haber üürenmää VIÇ derdi için, orada bütün informaţiya, kimdä cuvapları kabletmää soruşlara. Gelin Komrada, Lenin sokaa, 19, test yapacez, yada poliklinikada 6-cı katta hep var nicä testı geçmää».
Bu yıl akţiya gösterer, ani herbir insanın saalıı korunsun lääzım hep ölä nicä onun başka hakları korunêr.
Avtor: A. Karapirä, operator hem montaj: L. Arfanos