Moldovada veterinar doktor etişmeer- var 400 vakansiya, ama isteyan yok. Gagauziyada bu problema hep ölä aktual.
Moldovada veterinar doktor etişmeer. Bu problemayı devlet savaşȇr çözmää ödeyip genç uzmannara birzamankı para yardımını 200 bin ley işä girärkänä. İmek malların koruması agenstvosu kadra defiţiti notaladı, nicä devlet, ölä özel sektorunda 30 proţendä, haberledi Gagauziya imek malların koruması bakanı Mihail Tukan. Gelmeer gençlär veterinar işlemää küçük kazan paraların beterinä. Hem da isteerlär işlemää kasabalarda büük klinikalarda, urguladı Mihail Tukan. Bunun için devlet işlettirdi hem kabletti programayı lgota verilmesi için genç zanaatçılara, angıları veterinariya zanaatını kablettilär.
«Devlet yaptı bir programa, ki onnarı koymaa ayaa. Bu programaya girer yardım onnara 30 kilovat elektroenergiya, almaa arendaya yaşamak erini yada onu primariyalar parasız vererlär. Bundan kaarä bir skaldometra odun hem bir ton kömür, devlet çevirer parayı geeri her yıl. Hem da bir keret onnar kableder üç paylan 15 kazanç parasının sayısını ekonomikada»,- Mihail Tukan notaladı.
Bu yıl avtonomiyaya universiteti başardıktan sora geldi genç veterinar. Mihail Burka çeketti çalışmaa imek malları koruması bakannıkta. O nışanandı, ani diil hepsi onun arkadaşları universitettän gittilär işlemää. Bu küçük ödeklärlän baalı. Ama o sevinmeliklän hem havezlän çeketti kendi işini.
«Neçinki var programa, angısı genç uzmannarı tutturȇr. Orada sölener, ani genç uzmannara lgota veriler. İlk ay, açan bän işlemää çekettim, bän dokumentleri verdim. Komisiya bir ayın içindä onnarı baktı, da bän ilk tranşı kablettim. Neçinki bu yasrdım üç tranşa pay edili»,- Mihail Burka nışanandı.
Statistikaya görä her yıl veterinariya zanaatını başarȇr yakın 50 genç uzman.
