Yıldönümü medalilerini Gagauz Avtonomiyası 30-cu yılı için kablettilär Rus Kiseliyası yaşayannarı da. Onnar bu uzun hem meraklı istoriya yolu için annattılar.
Gagauziya kurulması istoriya olaylarında Rus Kiseliyası yaşayannarın da katkısı önemniydir. Küçüräk küücezä deyni, neredä yaşayannarın sade 18%-di gagauzlar, Gagauziyaya hem Komrat dolayına girmäk soruşu pek önemniydi, annadȇr Gagauziya kurulması veteranı Mariya Melniçenko: «Biz kurduk bir toplum, da her gün gidärdik Komrada neetlän, ki bizä versinnär izin lääzımnı dokumentleri bu iş için toplamaa. Pek islää tutȇrım aklımda, nicä biz yaşayannardan imzaları toplaardık. Korku vardı, ama biz bişey kanona karşı yapmazdık. Halkın istedii ozaman birdi».
Kendi fikirlerini Gagauziya kurulması için açıkladı Olga Kırpala da, o da gagauz Avtonomiyası kurulması proţesindä aktiv pay almış.
«30 yıl geeri, açan kurulardı avtonomiya, halk istäärdi, ki onun hakı gerçeklensin. Ozamankı olayların hatırınnan, büün Avtonomiya var hem ilerleer. Bizim borcumuz onu kaaviletmää»,- Olga Kırpala annadȇr.
Rus Kiseliyası Gagauziyaya hem Komrat dolayına girsin deyni yaşayannarın imzaları toplanardılar. Ozaman bu iş kolay olmadı, açıkladı küüyün primarı Georgiy Gospodinov: «Zordu, seçimnär, imzalar, bilütennär. Bakmayarak ona , ani Rus Kiseliyası Kiseliyä Mare küüyünnän barabardı, onnar Kagul dolayında kaldılar, bizim yaşayannarımızın istediinnän sä biz, Gagauziya Komrat dolayına girdik».
Gagauziya kurulmasında aktiv pay almaları için Başkan adından medalileri küüyün 18 yaşayana Gagauziya Bakannık Komiteti başı ilk yardımcısı İlyä Uzun verdi: «Bizim bu devledin var adı şansora. 30 yıl nicä 94-tä biz bizim kanonu kablettik. Ondan sora bizim Avtonomiya ofiţial olmaa başladı. 30 yıl az mı, çok mu? Bir taraftan baktıynan az, ama öbür taraftan bu çok vakıt. İsteerim şükür etmää bizim anaları, bobaları, angıları kurdular bizim Avtonimiyayı. Onnar, kurup, verdilär onu bizä. Bizim işimiz — korumaa onu. Ama biz lääzım bizim uşaklarımızı da buna üüredelim , ki onnar bilsinnär, kim yaptı, kim kurdu bizä Gagauziyayı. Lääzım bilsinnär Topalı, Kendigelänı, Dobrovu , Kalçuyu. Biz isteeriz herbir küüydä koymaa birär taş, da insan geçärkän, görsün, kim bu yada öbür küüdä kurdu Gagauziyayı».
MD Parlamenti eks- deputatı, Gagauziya kurulması veteranı Pötr Buzadji açıkladı kendi umudunu ona, ani ödüllenmiş yaşayannarlan Gagauz Avtonomiyası 50-ci yıldönümündä dä buluşacek.
«Kuvetlär veterannarı unutmadılar hem kararladılar onnarı yıldönümü medalilerinnän nışannamaa. Elbetki, veterannarın çoyu büünkü günä etişmedilär, ama biz ayakta bulunannarı koruyalım lääzım. Bän büük sevinmeliklär sizinnän Avtonomiyamızım 50-ci yıldönümündä buluşacam»,- Pötr Buzadji açıkladı .
«Gagauz Yeri-30-yıl» medalisini kabletti Gagauziya Bakannık Komiteti başı ilk yardımcısı İlyä Uzun da, angısı 30 yıl geri Avtonomiya kurulmasında pay aldı.
