Moldovada aylık kazanç parasının sayısı etmeer yaşamaa hem izmetlär için ödemää. Bu iş için söleerlär yaşayannar hem ekspertlär.
İnsan aalaşȇr, ani hepsi paalı da gelirlär etişmeer yaşamaya. Kimär sıra kazanç parası etişmeer satın almaa ne en ilkin lääzım yaşamak için.
«Moldovada etişmeer para yaşamaya. Etişmeer diil sade pensionerlerä, insana, kimdä var çok uşak. İnsan brayer, gider, zerä burada yok neredä kazanasın. Çok uşak bitirer şkolaları, universitetleri da bulmȇȇrlar kendilerinä iş da giderlär, zerä yok neredä kazansınnar, da yok neylän yaşasınnar».
«Kimä-sä eterli, kimä-sä diil eterli. Kirayı insan öder. Maş belli- zarzavat, meyva satın alȇr. Durum büün zor».
«Diil eterli, neçinki büük paada imek malları, şafk hem gaz- büük paada olȇrlar. Onun için da etişmeer para».
Avtonomiya yaşayannarı sayȇrlar, ani aylık ödeklär 15 bin leydän 30 binädän lääzım olsunnar. Sade bölä devlettän diil lääzım olacek sınır aşırıya gitmää nışannȇrlar insannar.
«Moldovada yaşamaa çok zor. Lääzım makar bir bin dollar olsun kazanmaa.»
«Bän sanȇrım, ani lääzım 20 bin ley gelsin evä, neçinki çok büük paada gaz, şafk hem imek malları. Onnarı ödemää lääzım, hem da taa kalsın ayın sonunadan. İlaçlanmak için kalsın, izmetleri ödemäk için, vergileri ödemäk için. Lääzım 20 bin olsun kazanç. 20-25 bin bir kişidän gelsin. İki kişi işlärsä, 25-30 bin lääzım evä gelsin».
Aaraştırmaklara görä, angılarını bir yıl geeri geçirdi ekonomika araştırmalarda akademiyası barabar profsoyuzlar milli konfederaţiyasınnan, gösterdi, ani Moldovada yaşamaa deyni ayleya dört kişidän lääzım 35 bin ley ayda. Eer bu dört kişidän iki uşak yada yaşlı insan, ozaman kim işleer, onun gelir sayısı 15 bin leydän diil taa aaz lääzım olsun. Ekspert Galina Şalar söledi nesoy onun bakışına görä lääzım kazanç parasının sayısı olsun Moldovada.
«Kazanç parası lääzım ölä olsun, ki insan kendi istemekleri yapabilsin. Minimal – aaç olmasın hem rubası olsun. Ama taa başka türlü o, açan sän islää iyersin, dinnenersin hem bilersin, ani kabledecän hepsi lääzımnı izmetleri- üüretmäk hem mediţina uurundan. Da sän isteyecän aylä kurmaa, uşak büütmää»,- ekspert Galina Şalar söledi.
2025-ci yılın yanvarin birindän Moldovada minimal kazanç parasının sayısı büüdü 5 bin 500 leyadän. İş hem soţial koruması ministerliin haberlerinä görä bu 10% taa çok, nekadar vardı bıldır hem 46,6% taa çok, nekadar 2021-ci yılda, açan minimal kazanç parasının sayısı 2 bin 935 ley kurardı.
