Gagauziyada iş panayırında büün bir vakansiyaya geler birkaç isteyхn, söleerlär iş verän bakannıında. Ama en zor iş bulmaa insannara kim 50 yaşından taa büük.
Bulmaa iş Gagauziyada taa zor olȇr, ama en zor insannara, kim pensiyaya yakın. Bakmayarak ona, ani bölä insannarda var kvalifikaţiya hem becermeklär onnarı işä almȇȇrlar, nışannȇȇr İş verän bakannıın başın işini götürän İrina Kara. Onnarın haberlerinä görä herbir üçüncü iş aarayıcı 50 yaşından 63 yaşınadan. Bu 27% danışannarın bütün sayısından. Yaraştırmak için 58% — o insannar 30 yaşından 49 yaşınadan, 15%- o gençlär 16 yaşından 29 yaşınadan.
«Eer iş vericisi alarsaydı işä insanı 50 yaşından taa büük, angısı agenstvoda sayıda bulunȇr , ozaman devlet verer ona subsidiya 80% ödek parasından, angısı belli individual annaşmakta. Altı ayın süresindä iş vericisi ödeyecek kazanç parayı bizim yardımızlan 80% sayıdan»,- söledi uzman.
Bu devlet programasının yardımınnan korumak agenstvosunun başı Georgiy Vlah şansora aldı işä yakın 20 kişi kim 50 yaşından taa büük, da o söleer, ani bu mehanizm halizdän işleer.
«Biz bu kanonu 2020-ci yıldan beeri kullanȇrız. Da beş yılın içindä yakın 16 kişiyä işä aldık Komratta, iki kişiyi Çadırda hem iki kişiyi Tarakliyada. Biz iş annaşmasını hazırlȇȇrız, ani işä alȇrız bir yılına»,- nışannadı Vlah.
Yılın çeketmesindän Gagauziya iş verän bakannıına danıştı 1600 kişi. Onnardan sade 40 proţent İşsiz ofiţial statusunu kabletti.Kalannar- kendileri iş aarȇrlar yada isteerlär iş erini diiştirmää. Kara İrinanın laflarına görä vakansiya listesindä 593 iş eri var.
«Şindiki vakıt bizdä agenstvada kaldı 167 vakansiya- 70 Komrat dolayında, 70 vakansiya Çadır dolayında hem 20 Valkaneş dolayında. Da bu işçi vakansiyalar. Maasuz uzmannar için taa aaz vakansiya var. Da taa sık sayıcıları aarȇȇrlar»,- urguladı İrina Kara.
Taa sorumnu işçi zanaatlar. Aarȇȇrlar satıcıları, kasirları hem işçileri.
«Valkaneş dolayında lääzım, neçinki orada elektrik tellär yapılȇrlar da orayı lääzım şoferlar türlü kategoriyalarda, yol infrastruktura işçileri. Pek sorumnu aşçı zanaatı»,- çizgiledi İrina.
Sezon vakıdında peydalanȇrlar eni kolaylıklar, iş verän bakannıında nasaat ederlär taa aktiv iş aaramaa kendinä.
Moldovanın hem Gagauziyanın en mekalı haberleri GRTnın Telegram kanalında!