Çadırda Valeriy Potapov adına sport okulunda kurulu koşullar genç sportçulara deyni. Burada baseyn açıldı, da şindi uşaklar enidän üzmää üürenerlär.
Baseyn düzülmesinä Gagauziya kuvetleri verdilär 630 bin ley. Enidän yapıldılar hepsi işlär, koyuldular komunikaţiya tertipleri, ne verer kolaylık uşaklara sportlan zanaatlanmaa bütün yıl.Gagauziya başkanı Evgeniya Guţul baktı bu enilenmiş baseynı hem urguladı, ani işlär yapılı üüsek uurda. «Bu baseyn pek önemli sport uuruna deyni hem açêr genç sportçulara eni kolaylıkları», — dedi başkan.
Bokslan zanaatlanan sportçular için üzmek pek faydalı, nışannadı birinci sport okulun başı Andrey Lazarev: «O uşaklar, angıları üzmää bilmeerlär,biz onnarı üürederiz. Kim biler üzmää, biz onnara taa çok daava vereriz. Vakıda görä üzmää. Çok taraftan uşakların ilerlemesi gider. Baseyn onnara pek faydalı, sevinerlär. Hem pek önemni, ani bizim zal boşanêr, biz birkaç grupayı birdän var nicä uuredelim. Bu baseyn -pek önemni bizim sport okulumuz için».
Boks treneri Vladimir Gradinar haberledi, ani bokslan uşaklar burada zanaatlanêrlar 4-5 keret aftada.
«Bu pek faydalı uşaklar için, onnarın saalına, burada boks sportuna üüreneriz. Baseynda onnar taa kaavi olaceklar hepsi sinirlär işleerlär. Hem da bu büük sevinmelik uşaklara deyni»,- Gradinar haberledi.
Çadır kasabasının birinci sport okulunda bokslan hem güreşmäklän zanaatlanêr 343 uşak.
