Düzüntücülük işleri T.Zanet adına liţeyindä geçirilerlär bakmayarak suuk havalara -yaamur engel etmedi brusçatkanın koyulmasına. Liţeyin başı Mariya Çebanova nışannadı, ani enilenmiş meydannar vereceklär kolaylık geçirmää burada yortuları hem uşaklara dinnenmää.
«Bizim liţeyin aulu enilener, şükür ederiz primȇriyayı hem bizim Gagauziyayı, ani bu proekt çıkacek üzä bizim liţeyimizdä»,- Kongaz küüyü T.Zanet adına liţey başıMariya Çebanova nışannadı.
Bozuk asfalt , kuyular gezmäk yolcaazlarında geeridä kaldılar.
«Pek geç seçildi karar. Tenderin geçirilmesi uzandı. Onuştan da işlär uzandılar dekabri ayına. Ama hava bizä yardım eder taa. Bu uura 486 bin ley verildi»,- nışannadı primar.
Gelän yıla liţey öndercilii plannȇȇr kurumda elektrik sistemasını diiştirmää. Elektrik sisteması V.Topal adına liţeyindä dä diiştiriler. İşlär lääzımnı istediklerä görä yapılȇrlar. Çebanov adına liţeyindä diişmeklerini uşaklar şansora notaladılar.
«Burada yaptılar çok gözäl işlär. Diiştirdilär brusçatkayı hem eni skemneleri koydular. Pek ii yaptılar».
«Büün bizim şkola oldu gözäl».
«Şkola pek gözäl, bän beenerim gelmää burayı».
«Pek sevdim, stadionu pek gözäl yaptılar. Eni setka koydular».
Erli bücettän 3 üürenmäk kurumunda düzüntücülük işlerini geçirmää deyni bir million leydän zeedä verildi. Primar nışannadı, ani bölä proektlär yardım ederlär infrastruktura uurunu ilerletmää.
«Uşaklar hem uşak başçasına, hem okullara gezerlär. Binalar primȇriyanın balansında bulunȇrlar, da biz onnarın düzülmesi için bücettän finans vereriz. Her yıl hem uşak başçalarında, hem okullarda nesä yapmaa savaşȇrız. Geçän yıl da, bu yıl da 5 uşak başçasına 200 binär ley verildi»,- nışannadı primar Mihail Esir.
Primar nışannadı, ani bu diişmeklär yardım ederlär kurmaa üürenmäk kurumnarında ii koşulları uşaklara deyni.
