Kazayak küüyün liţeyin üürenicileri «MediaLab» proektinin sınırlarında kendi pediaproektlerini kurȇrlar. Onnarın üüredicisi Valentina Kior proektlär konkursuna katıldı. Da taradı. Grantın yardımınnan şindi liţeydä mediasferasınnan baalı proekt giriştiriler.
Kazayak küüyün liţeyindä mediastudiya kuruldu. Üüürenicilär birliktä üüredicilerinnän Kior Valentinaylan hem teklif edilän uzmannarlan media-kontent kurmaa üürenerlär.
«Bän herzaman mediasferasınnan meraklanardım. Beenärdim işlemää patretlärlän, videolarlan. İstärdim geniştän üürenmää, nicä heberlär yapılȇr. Bu üzerä dä bu temayı seçtim, açan okulumuza deyni proekti kurardım. Proektä 9-cu klastan 12-ci klasadan üürenicilär katılȇrlar. Bän en ilkin sordum onnardan, kimä bu tema meraklı. Kim istedi, katıldılar. Onnarlan birliktä işimizi götüreriz»,- «MediaLab» proektin öndericisi Valentina Kior nışannadı.
Proektin sınırlarında üürenicilär üürendilär haberlerä analiz yapmaa. Faktları feyklardan ayırmaa. Bu kolaylıklar için onnara GRT-nın korespondenti Valentina Çoban annattı:«Büük havezlän katıldım bu proektä, çünkü bu liţey — benim ana ilţeyim. Bän burada 12 yıl üürendim. Bundan kaarä bän artık 15 yıl jurnalistika uurunda işleerim. Sevindim, ani var nicä bilgilerimnän üürenicilärlän paylaşım».
Treninglerin temaları türlü-türlü. Üüürenicilerä annattılar, nicä intervyuya hazırlanmaa hem dooru soruşları kurmaa, nicä okul haberlerini kurmaa hem okulda olan olaylar için geniştän annatmaa. Hep ölä üürenicilär petretlärlän hem kısa videolarlan işlemää üürendilär, montaj yapmaa denedilär. Bunun için Canva hem CapCut programalarını kullandılar.
«Bizdä liţeydä jurnalistika çevresi var. Şindi «MediaLab» proekti dä kendi işini başladı. Bu pek islää. Butakım üürenicilerimiz ilerleerlär, onnarın taa çok becermekleri olȇr»,- Kazayak küüyün liţey başı Diana Fazlı söledi.
12 klasın üürenicisi Sofiya Fazlı söleer, ani «MediaLab» proekti ona mediasferayı taa ii annamaa bir şans verdi. O artık kendisini intervyuer rolündä birkaç keret denedi. Hem annadı, ani bu meraklı hem cuvaplı bir zanaat.
«Bana deyni MediaLab — o bir kolaylık ilerlemää, eni hem faydalı bilgileri kabletmää. Bekim gelecektä jurnalist olmaa karar kabledecäm».
12 klasın üürenicisi Nikita Kuyujuklu söleer, ani ona deyni bu treninglar faydalı oldular.
«Büünkü gündä pek çok informaţiya var. Biz lääzım dikkat olalım, becerelim annamaa, angı haber aslı, angısı sa yalan, ki ötää dooru dezinformaţiya olmasın».
Üürenicilär eni bilgilerini artık kullanȇrlar. Onnar kendi mediaproektlerini kurȇrlar. Çıkarȇrlar patredä liţeydä geçirilän klastan dışarı dersleri hem yortulu olayları. Yazȇȇrlar üüredicilerinnän kısa intervyuları. Bu mediamateriallarınnan onnar soţial medialarda liţeyin sayfalarında paylaşȇrlar. «MediaLab» sadece bir fakultatıv diil. Burada üürenicilerin incäzanaat uurunda ilerlemää kolaylıkları var. Butakım onnar üüredicilerinin Kior Valentinanın yardımınnan bütün üürenmäk yılın süresindä kendi becermeklerini kaavileştireceklär.
