Üüredicilerin halklararası günü taa bir sıra gösterer o insannarın önemini, angıları kendi üreklerini, bilgilerini , kuvedini hem can sıcaklıını evladlarımızı terbietmeyä vererlär, nışannadı gagauziya Başkanı Evgeniya Guţul.
«Herbiriniz her gün büük cuvapţılıklan karşı geler. Siz diil sade bilgi verersiniz, siz insanın harakterini kurȇrsınız, siz hazırlȇȇrsınız gençleri hem terbiedersiniz onnarı patruot olmaa. Gagauziyamızın hem devletimizin şannı vatandaşları olmaa. Bu sizin en büük kıymetiniz cümnemizä deyni»,- nışannadı Evgeniya Guţul.
Bakmayarak zanaat zorluklarına hem zamandaş dünnenin istediklerinä , üüredicilär dünnenin temeli olȇrlar, çizgiledi başkan.
«Bizim okullarımızda işleyän üüredicilär hem terbiedicilär , insannar, angıları destek olȇrlar üürenicilerä diil sade okulda, ama yaşamakta da. Bu gagauziya geleceenä en büük katkı. Ondan, nesoy büün olaceklar bizim uşaklarımız-çekiler bizim sabaakı günümüz»,-söledi başkan .
Komradın kultura evindä toplandılar üüredicilär, analar hem üürenicilär, ki taa bir sıra göstermää saygı o insannra , angıları kendi yaşamaklarını geleceemizä adȇȇrlar. Çoyu onnardan ödülleri hem gramotaları kablettilär. Nadejda Junea 50 üüredicilik eder. İşinä sevgisi için Gagauziya şannı vatandaşı adını kabletti. Şannı üüredici adlarını bu gün 37 üüredici kablettilär. Onnarın arasında Aydar küüyü F.Angeli adına gimnaziyası başı N.Koçanji. Gagauziya başkanı hem HT adından gramotalar 43 üürediciyä hem terbiediciyä verildilär. Ali Özpala 4 yıl geeri Kongaz S.demirel adına liţeyindä işlemää başladı , o da ödülleri kabledennerin arasında bulundu. GHT başı Dm.Konstantinov şükür etii üüredicileri onnarın katkısı için cümnenin terbietmesi proţesinä.
«Bütün dünnä biler, hepsi devletlär bilerlär, ani eer biz istärsäk ilerlemää biz üüretimnän dostlaşalım lääzım. O devletlär, angıları başarılara çıkmaa isteerlär-üüretimi ilerlederlär. Biz da bunu yapmaa savaşȇrız. Örnek gibi 60%gagauziya bücetindän üüretim uuruna veriler»,- nışannadı spiker.
Yortulu olayda üüredicilerä şükürlük laflarınınnan Gagauziya Üüretim bakanı Natalya Kristeva da danıştı.
«Bizim işimiz-gerçek incazanaat, herbir üüredici bilimin hem uşaan arasında bulunȇr hem dirijör gibi cuvap eder, ani bu orkestr gözäl ötsün. Nicä 100 yıl geeri, ölä büün dä- üüredici lääzım olsun üürenik, ii ürekli, annasın uşakları her gün yapsın bu dünneyi taa aydınnık , taa kısmetli. Eer bu işi yaparsanız -siz geniysiniz»,- dedi Kristeva .
Üüredicilerdän kaarä, bu gün ödüllendilär terbiedicilär dä.
Avtor: A.Terzi, operator: A.Glekov, montaj: M.Kazaku