Moldovada noyabrinin 18-dän 24-nädän geçer antibiotiklerä sınaşmanın zararı için haberlemäk aftası. Kompaniyanın neeti tanıştırmaa yaşayannarı nicä dooru kullanmaa ilaçları infekţiya hastalıkları ilaçlarkana. Aftanın sloganı «Üürederiz, danişȇrız hem şindi yapȇrız .» Doktorlar nışannȇȇrlar, ani paţientlerin çoyu kullanȇrlar antibiotikleri. Evropada her yıl infekţiyalardan, angıları antibiotiklerä sınaşık, öler 30 bindän zeedä kişi.
Suuklamak yada başka kimi dertlerin ilaçlamasında kullanȇrlar mikroblara karşı ilaçlar. Büünkü gün var 15 antibiotik ilaç çeşiti, angılarını kullanȇrlar türlü dertlerin ilaçlamasında.
«Sade antibiotiklerin peydalanmasından sora biyaz ceerlerin hastalıı ilaçlamaa oldu kolaylık. Antibiotiklerin yardımınnan kimi infekţiyalar kaybeldilär. Da er ap-ansızdan antibiotiklär olmayaceklar, ozaman biz ondokuzuncu asirä dönecez. Antibiotiklär kol- kola giderlär himioterapiyaylan hem transplantologiyaylan»,- nışannadı Komrat dolayın medik yardımın soruşlarında baş uzmanı Vitaliy Mavrodi.
Bakmayarak antibiotiklärlän ilaçlamanın faydasına doktorların izinsiz onnarı olmaz kullanmaa nışannȇȇrlar mediklär. Onnarın diil dooru kullanması getirer ona, ani insanın güüdesi çekeder sınaşmaa ilaçlara da onnardan fayda olmȇȇr. Ama antibiotiklerin çok kullanması getirer ona, ani bitki bitkiya onnar ilaçlamȇȇrlar, ama zarar getirerlär.
«İlaçlamak antibiotiklärlän lääzım plana görä olsun, ama diil kontrolsüz. Kendibaşına ilaçlamak olmaz. Açan insan kendisi kararlȇȇr antibiotik içmää, o gider aptekaya da alȇr onu. Bu bir, ikinci kanon bozulması, açan ona satȇrlar bu antibiotikleri. İslää, açan bu antibiotiklär ilaçlȇȇrlar hem yok ederlär infekţiyayi. Ama eer bu olmarsaydı, ozaman saalıya zarar olȇr»,- çizgiledi Mavrodi.
Antibiotiklerä sınaşmak var nasıl insanın ölmesinä getirsin. Her yıl dünnedä 700 bin kişi bundan geçiner. Antibiotikleri kullanarkana viruslara karşı kaavi bakteriyalar baskı altına düşerlär da faydalı mikroorganizmalar yokedilerlär, söledi Vitaliy Mavrodi.
«Kendibaşına ilaçlamak olmaz. İkinci, antibiotiklerin kullanmasını medik uzmanı lääzım kontrol etsin. O bakȇr, kaç gün insan ilacı içer. O görer, var mı ondan fayda, hem da ilaçlamayı kontrol eder. Lääzımsaydı, dozayı zeedeleder. Lääzımsaydı, diiştirer onu»,- dedi doktor.
Statistikaya görä Moldovada hepsi satılan ilaçlardan on proţent o antibiotiklär. Mediklerin nasaatları yardım edecek insana kendi saalıını korumaa.
