Moldovada aprel ayın birindän çekedeceklär uşakları birinci klasa yazmaa. Amma kabletmäk kuralları diişti, var kimi eniliklär.
Üüretmäk ministerlii diiştirdi birinci klasa uşakların kabletmesinnän baalı koşulları. Eni metodika açȇr kolaylıkları vermää birinci klasa Moldova diasporadan, Evropa birliin vatandaşların, yabancı hem kaçkın insannarın uşaklarını hem kolaylıksız uşakları. Bu iş için haberledi Gagauziya üüretmäk bakannıın baş uzmanı Mariya Jekova. O nışannadı, ani bu uşakların kategoriyalarına veriler 10 proţent serbest erlerin sayısından.
«Giriştirildi eniliklär, üüretmäk kurumu resim –sport profildä geçirer kontrol etmekleri uşakların becermeklerinnän baalı belli edilän vakıtta. Hep ölä var diişmeklär uşakları birinci klasa almaklan baalı 10-cu punktta. Eklendi o, ani birinci klasa uşakları yazmaa deyni lääzım ana-bobadan danışmak, angısına taa lääzımnı dokumentlär eklener. Ama eni kurallarda var koşul kaçkın uşakları için. Onnar lääızm temsil etsinnär dokumendi, ani onnarda var kaçkın statusu hem birzamana yaşamak için izin. Bu punkt taa ileri yoktu»,- nışannadı üüretmäk bakannıın uzmanı.
Uşakları,angıları olmadılar edi yaşında üürenmäk yılın çeketmesinädän, var nasıl alsınnar birinci klasa, eer okulda varsaydı serbest erlär , bakarak bildirimä. Bu kurallar, diiyerlär kolaylıksız uşaklara da.
«Eklendi punkt, ani kurulȇr uşakların notalamsı, angıları yok edi yaşında hem angıları hazırlanmak grupasına başka başçasında gezmedilär, psihikomotorika hazırlamaları yok»,- annattı Mariya Jekova.
Kolaylıksız uşaklar için hep ölä kurulacek geçmäk yaslalardan okula, bakarak zanaatçıların nasaatlarına.
«Geçmäk proţesi geçecek, bakarak sıraya, angısını üüretmäk ministerlii kurdu üç etapa görä: geçmäk proţesin kurulması, uşakların yazılması birinci klasa, uşakların adaptaţiyası okula»,- annattı Mariya.
Kolaylıksız uşaklar, angıları için lääzımnı koşullar erindeki şkolalarda olmarsaydı, ozaman ana-boba danışmasına görä onnarı var nicä başka üüretmäk kurumnarına vermää, neredä bu koşullar var. Bu yıl bildirimneri çekedeceklär mart ayından kabletmää. Uşakları birinci klasa yazaceklar eni metodologiya kurallarına görä.
Gagauziyanın en mekalı haberleri GRTnın Telegram kanalında!