Cümnä seslemeklerin sırasında «Uşakları, angılarını mediţina uurunda finans yardımınnan lääzım tutturmaa fondundan» kanona diişilmekleri geliştirmäk soruşu açıklandı. İniţiativanın avtoru – HT deputatı Grigoriy Dülger.
İniţiativayı zeedeletmää parayı onkoylan hasta uşakların ilaçlamasını aşırıda, Beşalma küüyündän deputat Grigoriy Dülger teklif etti. Cümnä seslemeklerinä iniţiativanın deputatı, kimi sebeplerin beterinä, gelämedi. Onnan telefonda baalandı büdjet komisiyasının başı. Grigoriy Dülger kendi fikirini açıkladı.
«Kanon proekti, neredä bakılȇr yardım uşakların paalı ilaçlamasına devletimizdä hem biz 50% var olan paadan ödeeriz, ama o da 100 bini düşmeer geçsin, komisiya bakȇr. 8-ci statyada var punkt, er operaţiyaya lääzımsa çok para, Bakannık komiteti kendi kararınnan 200 bin leyädän var nicä ödesin»,- Grigoriy Dülger nışannadı.
Ana-bobalar uşaklarını ilaçlamak için aşırıya çıkȇrlar. Bu uura büük paralar lääzım, belli etti Grigoriy Dülger.
«Şindi aylä Kongazdan hem Komrattan aşırıda ilaçlanȇr. Bütündän aldıynan 6 uşak yabancı devletlerdä onko hastalıklarından ilaçlanȇrlar»,- sayȇr deputat.
Deputat belli etti, ani uşakların ilaçlanmasına tutturmak fondundan hepsi paralar harcanmȇȇrlar. Bakannık komitetin oturuşunda, fevralin 4-dä, kabledildi karar 50% zeedeletmää yardım parasını hasta uşaklara, söledi Saalıı korumak bakannıın başın yardımcısı Alöna Kozar.
«Yardım için çok insan danışȇr. 2025-ci yıla veriler 1 миллион 5 bin. 100 bindän — 150 binä kaldırdılar hem 200 bindän 300 binädän. Bitki yıl 807 bin ley kaldıydı»,- Alöna Kozar nışannadı.
HT büdjet komisiyasının başı Nikolay İvançuk bildirdi umudunu, ani teklifi deputatlar tutturaceklar.
«İniţiativa lääzımnı. Şindi soruş ţıfralarda» ,- söledi İvançuk.
«Uşakları, angılarını mediţina uurunda finans yardımınnan lääzım tutturmaa» kanonuna diişilmekleri geliştirmäk için karar HT oturuşunda kabledilecek, söledi Nikolay İvançuk.
